Eldi mekenderderde medıtsınalyq-sanıtarlyq alǵashqy kómektiń 90 nysany salynady

NUR-SULTAN. QazAqparat – Bıyl aýyldyq eldi mekenderde medıtsınalyq-sanıtarlyq alǵashqy kómektiń 90 nysany salynady. Bul týraly Úkimet otyrysynda QR Densaýlyq saqtaý mınıstri Alekseı Tsoı málim etti, dep habarlaıdy QazAqparat tilshisi.

«Qazirgi kezde aýyl turǵyndaryna medıtsınalyq qyzmetti 5272 ambýlatorlyq-emhanalyq densaýlyq saqtaý nysany kórsetip keledi, onyń ishinde úsh jylda 394 nysan salynyp, ashyldy. Atalǵan jobalardy júzege asyrý medıtsınalyq kómektiń sapasy men qoljetimdigin arttyrdy, ıaǵnı shalǵaıdaǵy eldi mekender qamtyldy. Sonymen birge, ákimdikter bekitken jol kartalaryna sáıkes, bıyl aýyldy eldi mekenderderde jalpy somasy 12,7 mlrd teńgege medıtsınalyq-sanıtarlyq alǵashqy kómektiń 90 nysanynyń qurylysyn júrgizý jáne iske qosý josparlanǵan», - dedi mınıstr.

Osy oraıda 36 medıtsınalyq, 20 feldsherlik-akýsherlik pýnkt jáne 34 dárigerlik ambýlatorııa qamtylyp otyr.

Onyń aıtýynsha, jobalyq-smetalyq qujatnama men olardyń memlekettik saraptamasyn ázirleý protsesin ońtaılandyrý úshin mınıstrlik medıtsınalyq-sanıtarlyq alǵashqy kómek nysandarynyń tıptik jobalaryn daıarlady.

«Almaty oblysynda medıtsınalyq-sanıtarlyq alǵashqy kómek nysandarynyń jeke daıyn jobalary bar. Osy jobalardy Qazaqstannyń ózge de óńirlerinde paıdalanýǵa bolady. Osy arqyly, qazirgi kezeńde bul nysandardy salý boıynsha josparlanǵan jobalardy júzege asyrý úshin barlyq qajetti jaǵdaı jasalyp otyr», - dedi A. Tsoı.