Eldi qıratý, tonaýdan eshkim utpaıdy – Mańǵystaýlyq qoǵam belsendisi

NUR-SULTAN. QazAqparat – Qańtardyń basynda elde bolǵan jappaı tártipsizdikter men Mańǵystaý oblysyndaǵy beıbit mıtıngke qatysty atalǵan óńir turǵyny, qoǵam belsendisi Samson Arakelıan óz oıyn ortaǵa saldy, dep habarlaıdy QazAqparat tilshisi.

«Mańǵystaýda munaı-gaz salasynda jumys istegen adam retinde baıqaǵanym, qazir jumysshylar óz oıy men problemasyn ashyq aıtý múmkindigi bar. Degenmen kóterilgen máseleniń az ýaqyttyń ishinde sheshilmeıtinin eskergen jón. Munaıshylar kóterip otyrǵan másele bir kúnniń ishinde sheshile qoımaıdy. Eń bastysy bılik pen jumysshylar arasynda durys dıalogtyń bolýy», - dedi Mańǵystaý oblystyq basketbol federatsııasynyń dırektory, «Doma Doma» qoǵamdyq qorynyń jetekshisi Samson Arakelıan.

Onyń aıtýynsha, elimizdiń batys óńirinde mıtıng beıbit túrde ótti.

«Qańtar oqıǵasy kórsetkendeı, zorlyq-zombylyq arqyly ózgeris eldiń damýyn keıinge shegeredi. Sondyqtan máseleniń beıbit jolmen sheshilgeni abzal jáne aldaǵy ýaqytta halyqtyń talaby kelisim arqyly sheshimin tabady dep senemin. Árıne, turǵyndar máselesin kóterip, bıliktiń nazaryn aýdartqysy keledi. Biraq shara beıbit formatta ótse jáne bılik problemaǵa nazar aýdarsa... Eldi qıratý, tonaýdan eshkim utpaıdy. Bárimizdiń de otbasymyz, jaqyn jandarymyz bar», - deıdi ol.