Eldi barlyq synaqtan súrindirmeı alyp shyǵatyn naǵyz kóshbasshy qajet - Máýlen Áshimbaev
«Kesheli beri elimizdegi iri saıası kúshter, respýblıkalyq qoǵamdyq birlestikter, ardagerler men jastar uıymdary jáne basqa da ujymdar aldaǵy prezıdent saılaýyna Qasym-Jomart Kemeluly Toqaevtyń kandıdatýrasyn usynyp jatyr. AMANAT partııasynyń kezekten tys XXIV sezinde de Memleket basshysyn Qazaqstan prezıdenttigine úmitker retinde usyný týraly sheshim qabyldanǵany belgili.
Osyǵan oraı, búgin halyqtyq koalıtsııa qurylyp, onyń quramyna engen barlyq saıası partııalar men qoǵamdyq uıymdar biraýyzdan Qasym-Jomart Toqaevtyń kandıdatýrasyna qoldaý bildirdi. Bul – memlekettiligimiz ben táýelsizdigimizdi nyǵaıtý jolynda jasalǵan mańyzdy qadam. Óıtkeni, qazirgideı kúrdeli kezeńde bizge osyndaı ortaq paıym men bekem birlik aýadaı qajet», - dep jazady Senat tóraǵasy.
Máýlen Áshimbaev búgin ótken qoldaýshylar forýmynda Prezıdenttiń el yntymaǵyna basa mán berip, ultty uıystyratyn jeti qaǵıdany aıqyndap bergenine toqtalady.
«Bul oraıda, Memleket basshysy Táýelsizdik, jerimizdiń tutastyǵy, memlekettik múdde, rýhanı úndestik, zańdylyq pen tártip, jasampazdyq jáne dostyq peıil men meıirimdilik bizdiń eldik jolyndaǵy eń basty qundylyqtarymyz ekenin aıryqsha atap ótti», - deıdi ol.
Keıingi jyldarda Prezıdent bastamasymen elimizde aýqymdy saıası, ekonomıkalyq jáne áleýmettik reformalar tabysty iske asyrylyp kele jatqanyn jazǵan Senat tóraǵasy saıası júıemizdiń aıtarlyqtaı jańǵyrtylǵanyna nazar aýdarady.
Sondaı-aq, qazirgi tańda búkil álemmen birge Qazaqstan da túrli jahandyq syn-qaterlermen betpe-bet kelip otyrǵanyn alǵa tartyp, halyqtyq koalıtsııanyń usynysy utymdy bolǵanyn atap ótedi.
«Osyndaı almaǵaıyp shaqta bizge eldi barlyq synaqtan súrindirmeı alyp shyǵatyn naǵyz kóshbasshy qajet. Osy turǵydan kelgende, kópshiliktiń Qasym-Jomart Toqaevtyń kandıdatýrasyn qoldaýy halyqtyń Memleket basshysyna degen senimi ekeni sózsiz. Sondyqtan, halyqtyq koalıtsııanyń usynysy – elimizdiń erteńi úshin eń utymdy sheshim.
Aldaǵy saılaý halqymyzdyń bereke-birligin arttyryp, memleket damýynyń jańa kezeńine jol ashady dep senemiz», - dep túıindeıdi Máýlen Áshimbaev.
Aıta ketsek, búgin elordada kezekten tys Prezıdent saılaýynda Qasym-Jomart Kemeluly Toqaevtyń kandıdatýrasyn qoldaý jónindegi halyqtyq koalıtsııanyń forýmy ótti.
«Barshańyz usynǵan ortaq kandıdat retinde prezıdent saılaýyna túsý – men úshin zor mártebe», - dedi Prezıdent atalǵan forýmda.
Sondaı-aq, Qasym-Jomart Toqaev jaqyn arada saılaýaldy tuǵyrnamasyn jarııa etetindigin aıtty.
