Elden 3,1 mln tonna astyq eksporttaldy

ASTANA. KAZINFORM — Astyq eksporty Ózbekstanǵa — 32,8%-ǵa, Qyrǵyzstanǵa — 2 ese, Aýǵanstanǵa — 28,8%-ǵa artqan. Bul týraly AShM baspasóz qyzmeti habarlady. 

«Qazaq temir joly» AQ derekteri boıynsha, 2025 jylǵy qyrkúıekten 27 qarashaǵa deıin 3,1 mln tonna astyq shyǵarylǵan. Salystyrmaly túrde aıtsaq, ótken jyldyń osy kezeńinde 2,7 mln tonna dán eksporttalǵan.

Qazaqstan astyqtyń eksporttyq tasymaly: Ózbekstanǵa — 32,8%-ǵa (1 066 myń tonnadan 1 416 myń tonnaǵa deıin), Qyrǵyzstanǵa — 2 ese (44 myń tonnadan 90 myń tonnaǵa deıin), Aýǵanstanǵa — 28,8%-ǵa (139 myń tonnadan 179 myń tonnaǵa deıin) artqan. 

Aıta ketelik elde egin jınaý naýqany tabysty aıaqtaldy. Dándi daqyldardyń ónimi 27 mln tonnadan asyp, maıly daqyldardyń jınalymy buryn-sońdy bolmaǵan deńgeıge jetti.

Bıyl dándi daqyldardan rekordtyq ónim alyndy — bastapqy salmaqta 27,1 mln tonna, onyń ishinde bıdaı — 20,3 mln tonna. Bul ótken jylmen salystyrǵanda 0,5 mln tonnaǵa kóp, alaıda bıdaıdyń egis alqaby shamamen 900 myń gektarǵa qysqarǵan bolatyn.

Bıyl alǵash ret burshaq daqyldarynyń ónimi 1 mln tonnaǵa jetti.

Maıly daqyldar boıynsha da rekord tirkeldi — 4,5 mln tonna, keı óńirlerde jınaý jumystary áli de jalǵasýda. Bul daqyldar egis qurylymynda barǵan saıyn tabysty ári suranysqa ıe bolyp otyr.

Ósimdik sharýashylyǵynyń basqa baǵyttary boıynsha da jaqsy nátıjelerge qol jetkizildi: kartop — 2,9 mln tonna, kókónis — 3,8 mln tonna, baqsha daqyldary — 2,6 mln tonna jınaldy.