Elden 3 mlrd teńge jınaǵan qarjy pıramıdasynyń quryltaıshylary 12 jylǵa sottaldy
«Qarjy pıramıdasy boıynsha Túrkistan oblysy polıtseıleriniń tergeýinde bolǵan eki myńnan astam jábirlenýshiniń isine núkte qoıyldy. Naqtyraq aıtsaq, polıtsııaǵa 2020 jyldan bastap «Evolution Corporation» men «Indıgo 24» JShS qarjy pıramıdasynyń qurbany bolǵan azamattardan aryzdar túsken. Olar respýblıkanyń 6 oblysy men qalalarynyń turǵyndary.
Sotqa deıingi tergep-tekserý bir jyldan astam ýaqyt boıy jalǵasty. Jedel qolǵa alynǵan jumystar nátıjesinde qarjy pıramıdasyn qurýǵa jáne ony basqarýǵa qatysy bar degen kúdikpen polıtsııa qyzmetkerleri 25 adamdy anyqtap, ustady. Olardan kompıýterlik tehnıka, jyljymaly jáne jyljymaıtyn múlikter tárkilendi», - dedi ІІM ókili.
Onyń aıtýyna qaraǵanda, polıtseıler men prokýrorlar kúdiktilerdiń kinásiniń dálelderin jınap, 15 túrli saraptama jasaǵan.
«Tergeýshiler qylmystyq toptyń birneshe jyldar boıy salymshylarǵa aqshalary eselep qaıtatyny boıynsha ýáde etip, turǵyndardan alaıaqtyq jolmen 3 mıllıard teńgeden asatyn qarajatty ıemdengenin anyqtady. Qylmystyq toptyń uıymdasqan sıpatta bolǵany, josparlanǵan túrde áreket etkeni jáne ár qatysýshynyń rólderi naqty bólingeni dáleldendi. Nátıjesinde tájirıbeli tergeýshiler men prokýrorlardyń kelisimimen aıyptaý aktisimen 1000 tomdyq qylmystyq is sotqa joldandy. Búgin osy qylmystyq is boıynsha sottyń úkimi shyqty. Atap aıtsaq, qarjy pıramıdasynyń uıymdastyrýshy, quryltaıshylary bolyp sanalatyn 3 adam 12 jylǵa, al olardyń orynbasarlary bolǵan 5 kúdikti 10 jylǵa, qalǵan 17 kúdikti 8 jylǵa bas bostandyǵynan aıyryldy. Sottalýshylardyń eń úlkeni 55 jastaǵy áıel bolsa, eń jasy – 31 jasta», - dedi Shuǵyla Turlybek.
