Eldegi JOO-lardyń úzdik oqytýshysy anyqtalmaq, jeńimpazǵa 6 mln teńge syıaqy bar

ASTANA. QazAqparat – «Joǵary oqý ornynyń úzdik oqytýshysy-2022» respýblıkalyq baıqaýyna qujattar 1-15 qarasha aralyǵynda qabyldanady. Konkýrs jeńimpazy 6 mıllıon teńgeden astam syıaqy alady. Bul týraly QazAqparat Ǵylym jáne joǵary bilim mınıstrliginiń baspasóz qyzmetine silteme jasap habarlaıdy.

Baıqaýdyń maqsaty – oqytýshy mamandyǵynyń bedelin arttyrý jáne joǵary oqý oryndary oqytýshylaryn kásibı turǵyda odan ári damýǵa yntalandyrý.

Baıqaýǵa joǵary oqý oryndarynyń shtattaǵy oqytýshylary qatysa alady. Olardyń úzdiksiz ǵylymı-pedagogıkalyq ótili (keminde 5 jyl), oqytýshylyq jáne ǵylymı qyzmette joǵary jetistikteri bolýy tıis. Ótinimder men qujattar aqparattyq júıe arqyly elektrondyq formatta qabyldanady.

Konkýrs 2 kezeńnen turady. Atap aıtsaq, aldymen joǵary oqý ornynyń ishinde, keıin respýblıkalyq deńgeıde ótedi.

«Joǵary oqý oryndarynyń qyzmetkerleri men professorlyq-oqytýshylar quramynan turatyn sarapshylar toby úmitkerdiń sandyq jáne sapalyq kórsetkishterin eki baǵyt – oqytý sapasy jáne ǵylymı-zertteý qyzmeti boıynsha baǵalaıdy. Saraptaý tobynyń qorytyndysy negizinde JOO komıssııasy konkýrsqa qatysýshylardyń ekinshi respýblıkalyq kezeńge qatysýy týraly sheshim shyǵarady. Respýblıkalyq deńgeıde qurylǵan komıssııa quramyna úkimettik emes uıymdar, BAQ, stýdenttik jáne jastar uıymdarynyń, JOO qaýymdastyqtarynyń ókilderi men sarapshylar engizildi», - dep habarlady Ǵylym jáne joǵary bilim vıtse-mınıstri Qýanysh Erǵalıev.

Aıta keteıik, «Joǵary oqý ornynyń úzdik oqytýshysy» baıqaýynyń jeńimpazdary aqshalaı yntalandyrýmen qatar, tósbelgige de ıe bolady.