Eldegi janar-jaǵarmaı baǵasy sharyqtap tur
ALMATY. 21 shilde. QazAqparat /Ádilet Musahaev/ - Qazaqstannyń birqatar óńirlerinde benzın tapshylyǵy sezilýde. Bul tolyǵymen ekonomıkanyń zańdaryna sáıkes oryn alýda, alaıda jaýapty qurylymdar muny udaıy elemeýge tyrysyp júr.
Bul jaıynda búgin «Gelıos» JShS-niń satý jáne marketıng jónindegi dırektory Denıs Trandafılov Almatyda arnaıy ótken baspasóz máslıhatynda aıtty.
Onyń aıtýynsha, sońǵy kezde Qazaqstan Respýblıkasy Kásipkerleriniń táýelsiz qaýymdastyǵyna munaı ónimderiniń bólshek saýda naryǵynda kásipkerlikpen aınalysyp júrgen bıznesmender jıi shaǵymdanatyn bolǵan.
«Janarmaı quıý stansalarynyń (JQS) qojaıyndary tapshylyqpen baılanysty oryn alyp otyrǵan jaǵdaıdyń basty sebebin benzın men dızel otynnyń satylý baǵasynyń Úkimet tarapynan májbúrleý arqyly tejelip otyrǵandyǵynan kóredi», -deıdi D.Trandafılov.
Sonymen qatar ol táýelsiz JQS qojaıyndary úshin bıznesti júrgizýdiń máni kóterme saýda men bólshek saýda arasyndaǵy baǵa aıyrmashylyǵy arqyly tabys tabýda jatqandyǵyn aıtyp ótti. «Alaıda, kóterme baǵa Munaı jáne gaz mınıstrligimen belgilengen shekti baǵadan joǵary bolǵan jaǵdaıda, bul bıznes shyǵyny joǵary bızneske aınalady. Otyn naryǵyndaǵy táýelsiz sýbektiler úshin kóterme baǵanyń joǵarylaýy jaǵdaıynda ákimshilik tarapynan bólshek baǵany belgileý osy sýbektiler úshin básekege qabiletsiz baǵa jaǵdaıyn jasap otyr. Bul jaǵdaı olardyń kúıreýine ákelip soǵatyn qaýip bolyp tabylady», -dep atap ótti D.Trandafılov.
Onyń aıtýynsha, bıliktegiler QR-nyń «Básekelestik týraly» Zańyn buza otyryp, kásipkerlerdiń baǵany ózderi retteýge zańdy quqyǵy bar óńirler aýmaǵyndaǵy baǵalardy da retteýge kirisip júr.
Zaýyttardyń júktemesi men tapsyrystyń jetkizilý kestesine baqylaý qoıý kompanııalardyń munaıdy jáne munaı ónimderiniń aǵymyn qaıta baǵyttaý jónindegi múmkindigin naryqtaǵy jaǵdaıǵa baılanysty tómendetedi, bul taǵy kásiporyndardyń tabystylyǵynyń tómendeýine ákelip soǵady. Qoryta kelgende, sektor óziniń ınvestıtsııalyq tartymdylyǵyn joǵaltýy múmkin dep oılaıdy mamandar.
