Eldegi jaǵdaıdyń jaqsarýyna ár qazaq yntaly bolýy tıis – Jabal Erǵalıev
Bul máselege Prezıdentimiz Qasym-Jomart Toqaev oryndy da ádil baǵasyn berdi. Úkimet pen jergilikti bılik oryndarynyń isti óz baqylaýlarynan bosatyp alǵandyǵyn, kúrdeli kezeńde jedel sharalar qabyldaı almaǵandyǵyn qatty synǵa aldy. Osy oraıda aımaqtaǵy azamattardyń oı – pikiri qandaı? «QazAqparat» HAA tilshisi osy týraly Kókshetaý qalasynyń turǵyny jazýshy, Qazaqstannyń eńbek sińirgen qaıratkeri, Senatorlar Keńesiniń múshesi Jabal Erǵalıevtiń ózekjardy oıyn jazyp alǵan edi.
Halyqtyń bir shybyn jandary úshin shyryldap, keı jaǵdaıda ashynýy da oryndy edi. Kisisi ólip, qaraly bolǵan jandardyń jan azasy men qaıǵylaryn da túsinýge bolady. Degenmen basqa túskendi sabyrmen kóterý de adamshylyq! Endi mine, birazdan beri Túrkistan oblysyndaǵy Shornaq aýyly men Qaraǵandy oblysynyń Sátpaev qalasyndaǵy oqıǵalar da juqarǵan júıkege shı júgirtkendeı boldy. Mundaı tóbeles te, Sátpaevtaǵydaı sumdyq oqıǵa da Qazaqstanda birinshi ret bolyp otyrǵan joq. Ras, bizdiń bala kezimizde de aǵalarymyz da, ózimiz de bir sovhozdyń ortalyǵynda turatyn orys pen de, nemis-polıaktarmen de tóbelese qalatynmyz. Arashashylar ara túsetin de, bir birine judyryq túıip, bolmasa sol arada tatýlasyp, ne kelesi kúni tatýlasyp túk bolmaǵandaı júre beretinbiz. Endi nege qazirgi jaǵdaıda eki dıasporanyń ókili shekisip qalsa, ony ultaralyq janjalǵa aparyp tirep qoıatyn boldyq? Sebebi nede?
Bul baǵyttaǵy jumystyń úlkeni Qazaqstan halqy Assambleıasynyń moınyna túsetini anyq. Óz basym osy Assambleıany jaqtap áli de qoldaıtyndardyń birimin. Jáne de bul Tuńǵysh Prezıdentimiz, Elbasy Nursultan Nazarbaevtyń el táýelsizdiginiń eleń-alań tusynda, zamannyń tolqymaly kezinde Qazaqstandy mekendep otyrǵan dıaspora ókilderiniń kóńilin jaılandyrý, olardy ortaq múddege jumyldyrý úshin jasaǵan kóregendigi bolatyn. Óıtkeni táýelsizdikti alǵashqy kezeńinde Kavkaz elderinde, Prıbaltıka memleketterinde ultaralyq janjaldar, qarýly qaqtyǵystar úreıdi alǵany boldy. Bizde de seperatıstik kúshter arandatyp baqty. Sol kezde Qazaqstan halqy Assambleıasy úlken mıssııa atqardy. Qazaqstandyq dıasporalardyń senimi oıandy. Al qazirgi jaǵdaıǵa kelsek, qazaqstandyq qoǵamnyń derti endi anyqtala bastady. Ol dertti joıý úshin de ýaqyt kerek! Alaıda sol ýaqytty halyqtyń múddesin sheshýge tıimdi paıdalana bilý qajet. Halyqty bir múdde, Ulttyq múdde tóńireginde toptastyra alǵanymyz abzal! Ultyń múddesi - Táýelsizdik! Ulttyń múddesi -demokratııalyq qoǵam! Ulttyń múddesi - eldiń birligi men tynyshtyǵy! Ulttyń múddesi - Ulttyń óz tiliniń Jasaýy! Ulttyń múddesi - Zańnyń ústemdigi! Ulttyń múddesi-áleýmettik Teńdik! Ulttyń múddesi - Aýylynyń jańǵyrýy! Ultty múddesi-Jemqorlyqty joıý!
Sońǵy jyldardyń elimizdiń ár oqıǵasyn nazardan jibermeı, tamyr soǵysyn basyp kele jatyrmyn. Basý sózimizdi de, ashý sózimizdi aıttyq. Osy eldiń bir azamaty retinde halqymyzdyń birligi ketpegenine qýanamyn!
Prezıdentimiz óziniń alǵashqy Joldaýynda Іshki Іster Organdarynyń jumysyn qaıta qaraý, olar jazalaýshylyqtan halyqqa qyzmet kórsetýshi organyna aınalý kerektigin aıtqan bolatyn. Qasym-Jomart Kemeluly aldaǵy Joldaýynda osy bir ózekti máselege qaıta oralatyn bolar.
Sát saıyn qubylyp turǵan zamannyń qarsy betten soqqan daýylyna qasqaıyp qaraıtyn kún týdy! Óz basym tanyǵan da, tańdaǵan da tulǵam Qasym-Jomart Toqaev qazaq elin osy bir tyǵyryqtan alyp shyǵa alatyn tulǵa dep bilemin. Eń bastysy Qasym-Jomart Toqaev ardy jáne óz ultynyń múddesin attap kete almaıtyn parasatty tulǵa! Sonymen birge jaǵdaıdy túzetýge, myna indetti joıýǵa, eldi órkendetip, damytýǵa árqaısymyz da yntaly bolaıyq, árqaısymyz qolymyzdan keler isti yjdahattylyqpen atqara bileıik! Prezıdenttiń de, Siz ben bizdiń de bir ǵana Otanymyz bar! Ol - Qazaqstan!
Jáne de qazir basshyǵa da, qosshyǵa da ońaı bolyp turmaǵandyǵy da anyq! Osy bir alasapyrandy kezeńde ózimizdiń birligimizden, yntymaǵymyzdan jazbaıyq, sabyrly bolyp, bir mezgil aıtqanǵa da qulaq asyp, qazirgi indetti jeńýge jáne qoǵamdy óz «indetinen» tazartýǵa yntaly bolaıyq!
Ashý artta, aqyl alda júretin kez! Sabyr túbi sary altyn degendi atalarmyz bilmeı aıtpaǵan bolar?!
