Eldegi zerthana jumys istemegenimen qazaqstandyqtar dopıng testti shetelde tapsyrdy
ASTANA. QazAqparat - Almatydaǵy Antıdopıngtik zerthana dıskvalıfıkatsııalanǵan kezde qazaqstandyq sportshylar shetelde dopıng testin tapsyrdy. QazAqparattyń resmı saýalyna oraı Ulttyq antıdopıngtik ortalyqtyń jaýabynda osylaı delingen.
«Almaty qalasyndaǵy antıdopıngtik zerthana jumysy toqtatylǵan ýaqytta sportshylardan alynǵan barlyq dopıng-baqylaý synamalary Búkilálemdik antıdopıngtik agenttiktiń akkredıtatsııasy bar álemniń basqa da antıdopıngtik zerthanalaryna jiberildi», - delingen habarlamada.
Buǵan qosa, Ulttyq antıdopıngtik ortalyq Búkilálemdik antıdopıngtik agenttiktiń atalǵan sheshimine shaǵym jiberilgen-jiberilmegendigi, sońǵy 4 aıda zerthana qandaı jumystar atqarǵandyǵy jáne akkredıtatsııany ýaqytsha toqtatý qashan aıaqtalatyndyǵy jaıynda eshqandaı aqparattyń joq ekendigin habarlady.
Esterińizge sala keteıik, 24 maýsymda WADA (Búkilálemdik antıdopıngtik agenttik) Almaty antıdopıngtik zerthanasyn halyqaralyq standarttarǵa saı emestigine baılanysty akkredıtteý quqyǵynan aıyrdy. Atalǵan agenttik taratqan aqparatta zerthana jumysy 4 aı ýaqytqa shektelgeni, eger buzýshylyqtar durystalatyn bolsa, akkredıtteý quqyǵy qaıtarylatyny aıtylǵan.
Aıta keterligi, 16 maýsymda IWF London Olımpıadasynyń chempıony atanǵan tórt birdeı aýyr atletimiz Ilıa Ilın, Svetlana Podobedova, Maıa Maneza, Zýlfııa Chınshanlonyń jarystarǵa qatysý quqyǵyn shektegen bolatyn. Sál keıinirek olardyń qataryn Almas Óteshev, Irına Nekrasova, Marııa Grabovetskaıa, Vladımır Sedov tolyqtyrdy.
17 tamyzda Halyqaralyq aýyr atletıka federatsııasynyń (IWF) basshysy Tamash Aıan Rıo-de-Janeırodaǵy Olımpıada aıaqtalǵannan keıin Reseı, Qazaqstan, Belarýs aýyr atletıka federatsııasyn bir jylǵa jarysqa qatysý quqyǵynan aıyratyndyǵyn habarlaǵan edi.
«Rıodaǵy Olımpıadadan keıin birqatar elderdiń músheligin toqtatamyz. Oǵan kepildik beremin. Olar Reseı, Qazaqstan, Belarýs. Qaıta taldaý aıaqtalǵan joq, aqparat kútip otyrmyn, taǵy birneshe el jarystan shettetilýi múmkin. Ony qyrkúıektiń aıaǵynda nemese qazanda málimdeımiz», - deıdi IWF basshysy.
