Eldegi vagon parki SQO-da jasalǵan ashyq vagondarmen 25 paıyzǵa jańartylmaq

PETROPAVL. QazAqparat – Soltústik Qazaqstan oblysyndaǵy «ZIKSTO» zaýyty aldaǵy eki jylda 2 myń platforma vagondy jasap shyǵarady, dep habarlaıdy QazAqparat tilshisi.

SQO-daǵy «ZIKSTO» AQ aldaǵy eki jyl boıy «Qazaqstan Temir Jolynyń» tapsyrysyn oryndaıdy.

Bul jaıynda búgin óńir basshysy Qumar Aqsaqalov halyq aldyndaǵa eseptik kezdesýinde aıtty.

Onlaın formatta ótken kezdesýde oblys ákimi atqarylǵan jumysty saralaı kele, aldaǵy atqarylar úlken jobalar jaıynda aıtty.

Sonyń biri «ZIKSTO» zaýytyna tıesili.

«Qazirgi tańda eldegi vagon parki orta eseppen 54% eskergen. Qazaqstandyq vagondardy jańalaýǵa bizdiń «ZIKSTO» zaýyty óz úlesin qosady. Kásiporyn «Qazaqstan temir jolynan» úlken tapsyrys aldy. Zaýyt osylaısha 2 jylǵa jumyspen qamtyldy. Qazaqstanda qazir bar bolǵany 8 myń platforma bar. Sonyń 2 myńy bizdiń zaýyttyń ónimimen jańartylmaq. Bul respýblıka ekonomıkasyn damytýǵa aıtarlyqtaı úles», - deıdi Qumar Aqsaqalov.

Óńir basshysynyń aıtýynsha, SQO – agrarly aımaqtan agrarly-ındýstrıaldy aımaqqa ótýi tıis.

Osy maqsatta óńirde bolashaǵy zor ınvestıtsııalyq jobalar júzege asyrylyp jatyr. 2019 jyly Petropavlda «Qyzyljar» ekonomıkalyq aımaǵy quryldy.

Qazir munda úsh ınvestıtsııalyq joba boıynsha jumystar qolǵa alyndy.

Otandyq ınvestor 300 jumysshysy bar kásiporyn ashyp, jylyna 13 myń transformator shyǵarmaq. Ónimi eksportqa baǵyttalǵan.

«Keletin ınvestorlarǵa óńirde barynsha yńǵaıly jaǵdaılar jasalǵan. Nátıjesinde nemistiń «Claas» kontserni óz zaýytyn ashyp jatyr. Álemdik brend kóp jylǵy kelissózderdiń arqasynda oblysta kombaın qurastyratyn boldy. Osylaısha jergilikti sharýalar jańa kombaındy alýda qarajatyn 50% únemdeıdi», - deıdi oblys ákimi.

Byltyr SQO-da ınvestıtsııalar kólemi 20% ósip, 281 mlrd teńgege jetti.

Onyń 20 mlrd teńgesi - sheteldik ınvestıtsııa. Bıylǵy meje – 338 mlrd teńge.

Osy maqsatta bos turǵan ǵımarattar jónge keltirilip, ornynda jańa kásiporyndar ashylyp jatyr.