Eldegi úzdik áleýmettik jaýapty kásiporynnyń biri - «Aqsaıgazservıs» AQ-da sońǵy jyldary 1700 jumys orny ashylǵan
«Qazaqstannyń úzdik taýary» kórme-baıqaýyna Batys Qazaqstannan 8 kásiporyn qatysqan bolatyn. Máselen, «Óndiristik maqsattaǵy úzdik taýarlar» atalymynda «Batys Qazaqstan mashına jasaý kompanııasy» AQ, «Stroıkombınat» jáne «Álim» JShS-lary baq synady. «Halyq tutynatyn úzdik taýarlar» boıynsha «Oral saýda-ónerkásip kompanııasy», «Gıdromash-Orıon-MJBK», «Altımstroıdetal» seriktestikteri synǵa tústi. Al «Jelaev nan ónimderi kombınaty» AQ men «Kýbleı» JShS «Úzdik azyq-túlik taýarlar» atalymynda oblys namysyn qorǵady. Elimizdiń 135 kásiporyn men jeke kásipkerligi qatysqan kórme qorytyndysynda óńirdegi un, makaron ónimderi óndirisiniń kóshbasshysy sanalatyn «Jelaev astyq ónimderi kombınaty» AQ ІІ dárejeli dıplomdy ıelendi.
Mekemeniń áleýmettik baǵdarly áreketiniń úlgisin qalyptastyrǵan, óńirler men aýyldardyń ınfraqurylymyn damytqan, áleýmettik salada kórsetiletin qyzmetterdi keńeıtken kásiporyndar «Paryz» syılyǵyna usynylyp keledi. Jyl ótken saıyn áleýmettik jaýapkershiliktiń artqanyn bul baıqaýǵa qatysatyndardyń sanynan da kórýge bolady. Mysaly, 2008-2012 jyldary atalmysh sharaǵa elimizdiń barlyq óńirinen 2186 kásiporyn qatysqan. Bıyl óz baqtaryn synaǵan 525 kásiporynnyń otyzy - batysqazaqstandyq. «Úzdik áleýmettik jaýapty kásiporyn» atalymyndaǵy «Іri kásipkerlik nysany» sanaty boıynsha jeńimpaz bolyp Bórli aýdanyndaǵy «Aqsaıgazservıs» AQ (prezıdenti Tilek Shektibaev) tanyldy. Sońǵy jyldary bul kásiporynda 1700 jumys orny qurylǵan. Kompanııa basshylyǵy óz qyzmetkerlerimen 5-7 jylǵa deıin shart jasaýynyń arqasynda ujym osy aralyqta jumyspen jáne turaqty jalaqymen qamtamasyz etilip otyr. Ortasha aılyq jalaqy 61,5 paıyzdan astam joǵarylady. Ótken jyly qyzmetkerlerdi oqytýǵa 10,1 mln. teńgen jumsaldy. Jyl saıyn eńbekti qorǵaý jáne onyń qaýipsizdigine qatysty máselelerdi sheshý úshin 95 mln teńge qarjy qaralýda. Byltyr barlyq qyzmetkerdi erikti medıtsınalyq saqtandyrýǵa bólingen qarajat 22 mln teńgeni qurady.
