Eldegi sý sharýashylyǵy obektileri 60% tozǵan

ASTANA. QazAqparat – Elde jańadan salynǵan gıdrotehnıkalyq qurylystardyń sapasy da alańdaýshylyq týǵyzyp otyr. Bul týraly QR Tótenshe jaǵdaılar mınıstri ıÝrıı Ilın aıtty, dep habarlaıdy QazAqparat tilshisi.

«Ekologııa jáne tabıǵı resýrstar mınıstrligine gıdrotehnıkalyq qurylystardyń sý tasqynyna ázirligin baǵalaý olardyń jyl saıynǵy kóbeıýine baılanysty da qıynǵa soǵýda. 2022 jyldyń basynda 1 823 gıdrotehnıkalyq qurylys bolsa, onyń 537-si jóndeýdi qajet etse, bıyl olardyń sany 1 806-ǵa jetti, 534-i jóndeýdi qajet etedi», - dedi mınıstr Úkimettiń búgingi otyrysynda.

Olardyń kóbisiniń tehnıkalyq jaı-kúıi jabdyqtyń tozýy, negizgi konstrýktsııalardyń ýaqytsha eskirýi jáne kúrdeli jóndeýler júrgizý sebebinen paıdalaný talaptaryna saı kelmeıdi.

«Eldegi sý sharýashylyǵy obektileriniń naqty tozýy 60%-dan astamdy quraıdy, osyǵan baılanysty olardyń senimdiligi men qaýipsizdigi tómendegen. Ótken ǵasyrda salynǵan gıdrotehnıkalyq qurylystar ǵana emes, jańa GTQ da alańdaýshylyq týǵyzady. 2021 jyly Almaty oblysynda kommýnaldyq menshiktegi sý qoımalaryn paıdalaný qaǵıdalaryn buzýdyń 3 faktisi tirkeldi, onda GTQ-dan tómen ornalasqan eldi mekenderdi sý basý qaýpi týyndady», - dedi TJ mınıstri.

Aıta keteıik, bıyl sý tasqyny qardyń kóp bolýyna jáne topyraq qabatynyń qatty tońazýyna baılanysty aýqymdy bolatyn túri bar. Sý basý aımaǵynda 255 eldi meken bolýy múmkin, bul 127 myńnan astam úı jáne 700 myńnan astam azamat.

Tótenshe jaǵdaılar mınıstri ıÝrıı Ilınniń aıtýynsha, óńirler iri qalalardyń qaryn shyǵarady, aýyldar nazardan tys qalýda.