Eldegi ózin-ózi jumyspen qamtýshylardyń basym bóligi salyq tólemeıdi jáne olar memlekettiń saqtandyrý sharalarynan da tys qalǵan - A.Samaqova
ASTANA. Qańtardyń 19-y. QazAqparat /Aıdar Ospanalıev/ - Qazaqstandaǵy resmı túrde jumyspen qamtylǵandardyń arasynda ózin-ózi jumyspen qamtýshylar sany 30 paıyzdy quraıdy.
Bul óte úlken kórsetkish. Bul týraly búgin Astanada «Almaty qalasy men Almaty oblysynyń Eńbekshiqazaq aýdanynyń úlgisindegi halyqtyń ózin-ózi jumyspen qamtý jaǵdaıy týraly» atty taqyrypta ótken dóńgelek ústel otyrysynda Májilis depýtaty Aıtkúl Samaqova málim etti, dep habarlaıdy QazAqparat.
Onyń sózine qaraǵanda, eldegi ózin-ózi jumyspen qamtýshylardyń basym bóligi halyqqa túrli sala boıynsha qyzmet kórsetedi jáne saýda jasaıdy. «Mundaǵy basty másele, bizdiń zańnamamyzda ózin-ózi jumyspen qamtýshylar degen túsiniktiń maǵynasy jan-jaqty ashyp kórsetilmegen. Soǵan qaraı atalmysh sanatqa qandaı azamattardyń jatatyndyǵy da jan-jaqty túsindirilmegen. «Turǵyndardy jumyspen qamtý týraly» zańynda ózin- ózi jumyspen qamtýshylar degenimiz «ózdiginen paıda taýyp ómir súrip júrgender, eńbekke qabiletti azamattar» degen syńaıdaǵy túsinik beriledi. Al memlekettik statıstıkaǵa qajetti qujattarda bul anyqtama basqasha túsindiriledi. Basqasha aıtqanda, onda ózin-ózi jumyspen qamtýshylar dep eńbekaqysy belgili bir taýardy satýdan nemese belgili bir qyzmet kórsetýden túsken paıdaǵa baılanysty istermen aınalysatyn azamattar dep belgilengen», dedi depýtat.
Sondaı-aq, onyń aıtýynsha, atalmysh qujatta ózin-ózi jumyspen qamtýshylar 4 túrli topqa bólinip kórsetilgen. Olar jumys berýshiler men ózdiginen paıda taýyp jumys istep júrgender, eńbegine aqy tólenbeıtin otbasynyń jumysshylary jáne óndiris kooperatıvteriniń músheleri. Sondaı-aq depýtattyń aıtýynsha, elimizdiń Salyq kodeksi ózin-ózi jumyspen qamtýshylardyń tek jekelegen toptaryn ǵana qamtıdy. Olar ózderiniń kiristerin óz erkimen tirkep, qosymsha qun salyǵyn tólep, zeınetaqy jınaqtaý qorlaryna qarjy bóletin organdar. Sonymen qatar salyqpen resmı organdarda tirkelgen jeke kásipkerler men jeke ıeliktegi notarıýstar men advokattyq qyzmetpen aınalysatyndardy jatqyzýǵa bolady. Buǵan qosa, elde tirkelgen dıplomatııalyq ókildikterge qyzmet kórsetetin organdar men eńbek kelisimine sáıkes qyzmet etetin úı qyzmetkerlerin jatqyzýǵa bolady. «Al ózin-ózi jumyspen qamtýshylardyń basym bóligi negizinen ózderiniń kiristerin de tirkemeıdi, eshqandaı salyq ta tólemeıdi. Zeınetaqy jınaqtaý qorlaryna da qatyspaıdy. Sóıtip memlekettik saqtandyrý sharalarynan tys qalady», dedi A.Samaqova.
Otyrys barysynda jıynǵa qatysýshylar ózin -ózi qamtý máselesine qatysty osy tektes ózge de birqatar máselelerdi talqyǵa saldy.
