Eldegi nashaqorlar sany resmı statıstıkadan 5 ese kóp – mınıstr

ASTANA. QazAqparat – Іshki ister mınıstri Marat Ahmetjanov Úkimet otyrysynda eldegi nashaqorlardyń resmı statıstıkadaǵy sany naqty jaǵdaıda alshaq ekenin málim etti, dep habarlaıdy QazAqparat tilshisi.

«Búginde nashaqorlardyń naqty jáne senimdi esebi joq. Sarapshylardyń pikirinshe, olardyń naqty sany resmı derekterden keminde 5 ese kóp. Sondyqtan, tolyqqandy esepti qalyptastyrý úshin málimetterdi ártúrli derekózderden alý qajet», - dedi mınıstr.

Vedomstvo basshysy Densaýlyq saqtaý mınıstrliginiń azamattardyń birneshe sanatyna esirtkige qarsy skrınıngti mindetteý týraly usynysyn qoldaıtynyn aıtty.

«Saraptama esirtki tutynýshylardy birinshi satyda anyqtasa, ondaı adamdardyń 95 paıyzyn qalypty ómirge oraltýǵa bolatynyn kórsetip otyr. Úshinshi satyda anyqtalǵandardyń 15 paıyzy ǵana (ońalady-red.). Esirtkiniń túri kóp. Tipti mektepte de tarap jatyr, ony biz jasyryp otyrǵan joqpyz. Búginde naqty esebi joq. Men bıomaterıal skrınıngin ótkizýdi usynyp otyrmyn. Negizi bul Densaýlyq saqtaý mınıstrliginiń usynysy. Biz ony qoldadyq. Endi joǵary oqý ornyna túskende, memlekettik jáne áskerı qyzmetke ornalasqanda, jumysqa turǵanda skrınıgten ótý kerek bolady. Qoǵam men balalarymyzdyń qaýipsizdigi mańyzdy ekenin túsinýimiz kerek. Bıomaterıaldardan esirtki anyqtalsa, ákimshilik jaýapkershilikke tartylmaıdy. Ondaı málimet olardyń ata-anasyna jiberiledi», - dedi Marat Ahmetjanov.