Eldegi memlekettik sáýlet-qurylys baqylaý basqarmalary QR QTKShІ Agenttiginiń quzyryna ótedi - N.Tıhonıýk
ASTANA. 12 tamyz. QazAqparat /Gúlmıra Alıakparova/ - Oblystar men Astana jáne Almaty qalalaryndaǵy memlekettik sáýlet-qurylys baqylaý basqarmalary QR Qurylys jáne turǵyn úı-kommýnaldyq sharýashylyǵy isteri agenttiginiń quzyryna ótedi.
Bul týraly búgin QazAqparat tilshilerine bergen suhbatynda Agenttik tóraǵasynyń orynbasary Nıkolaı Tıhonıýk málim etti.
«Barlyq memlekettik sáýlet-qurylys baqylaý basqarmalary (MSQBB) bizdiń (red. - Agenttiktiń) enshimizge berilýde. Tıisti Jarlyqtyń jobasy ázir. Osy ýaqytqa deıin MSQBB-lar jergilikti basqarý organdardyń qaramaǵynda bolyp keldi. Eske salsaq, olar buǵan deıin bizdiń quzyrymyzda boldy. Tek 2005 jyly ákimdikterge berildi. Prezıdenttiń pikirinshe, bul asyǵystyq jasaldy. Sebebi, sheshimder qabyldaıtyn da, ruqsattar beretin de - tek ákimder. Bul durys emes. Ony bireý qadaǵalaý kerek. Alǵashqy qadam retinde biz, jergilikti atqarýshy organdardyń sáýlet jáne qurylys jumystary boıynsha qyzmetin qadaǵalaý úshin Zańǵa (red. - «Turǵyn úı qatynastary týraly» QR Zańyna) ózgertýler engizdik. Bul jumystar bastaldy. Ekinshi qadamymyz - MSQQB-lardyń quzyrymyzǵa berilýi», - dedi ol.
N.Tıhonıýk atap kórsetkendeı, MSQQB-lardy Qurylys jáne turǵyn úı-kommýnaldyq sharýashylyǵy isteri agenttiginiń qaramaǵyna berý jumystary aldaǵy qyrkúıek-qazan aıynda tolyǵymen aıaqtalýy tıis.
