Eldegi kólik medıtsınasyn damytý máseleleri talqylandy - Úkimet janyndaǵy Ulttyq Úılestirý keńesiniń otyrysy
ASTANA. 16 mamyr. QazAqparat - Búgin vıtse-premer Erbol Orynbaevtyń tóraǵalyǵymen QR Úkimeti janyndaǵy Densaýlyqty qorǵaý jónindegi Ulttyq Úılestirý keńesiniń XVII otyrysy boldy.
Jıynda Qazaqstandaǵy kólik medıtsınasyn damytý máseleleri talqylandy,- dep habarlady Densaýlyq saqtaý mınıstrliginiń baspasóz qyzmeti.
Búgingi tańda memleket tarapynan halyqqa, ásirese alystaǵy aýdandarda ómir súretin turǵyndarǵa kórsetiletin medıtsınalyq kómektiń qoljetimdiligin arttyrýǵa úlken kóńil bólinýde.
Ótken jyly sanıtarlyq avıatsııa boıynsha respýblıkalyq úılestirý ortalyǵy qurylyp, alǵashqy ushyrylym 2011 jyldyń 12 shildesinde júzege asyryldy. Jalpy alǵanda, byltyr 323 ushyrylym jasalyp, 385 naýqasqa medıtsınalyq kómek kórsetildi, 500-ge tarta túrli mamandyqtaǵy dárigerler tartyldy. Al 2012 jyldyń 4 aıy ishinde 220 ushyrylym júzege asyrylyp, 300-deı dárigerlik kómek kórsetildi.
Aıta ketý kerek, aǵymdaǵy jyly Qazaqstanda óndirilgen alty ES-145 tikushaǵyn satyp alý josparlanǵan. Mamyr aıynda Ka-32 tikushaǵy jetkizildi.
2011 jyly QR Densaýlyq saqtaý, Kólik jáne kommýnıkatsııa, Іshki ister, Tótenshe jaǵdaılar mınıstrlikteri birlesip, respýblıkalyq mańyzdaǵy apattar jıi bolatyn 40 jol telimin anyqtady. Atalǵan jol telimderi kórsetilgen Qazaqstannyń ınteraktıvtik kartasy ázirlendi. Almaty, Qaraǵandy, Jambyl jáne Ońtústik Qazaqstan oblystarynda alty trassalyq medıtsınalyq-qutqarý tirekterin qurý jumystary bastalyp, qurylysyn aǵymdaǵy jyly aıaqtaý kózdelip otyr.
Qajetti medıtsınalyq jáne qutqarý quralǵylarymen jabdyqtalǵan alty medıtsınalyq-qutqarý reanımobılderi satyp alyndy. Trassalyq medıtsınalyq-qutqarý tirekteriniń barlyq brıgadalary jol-kólik apattary kezinde zardap shekken naýqastarǵa shuǵyl medıtsınalyq kómek kórsetý jumystaryna kirisip ketti. Qazirge deıin 54 shaqyrý túsip, aýyr jaraqat alǵan 12 adamnyń ómirin saqtap qalyp, orta jáne jeńil deńgeıde jaraqat alǵan 44 azamatqa qajetti kómekter kórsetildi.
Memleket basshysynyń tapsyrmasyn oryndaý maqsatynda QR Densaýlyq saqtaý jáne Tótenshe jaǵdaılar mınıstrlikteri, «Qazaqstan temir joly» AQ birlesip, «Densaýlyq», «Járdem» jáne «Salamatty Qazaqstan» atty úsh emdeý-dıagnostıkalyq poıyzyn iske qosty. «Salamatty Qazaqstan» poıyzy telemedıtsınalyq ortalyq, turaqty telefon jelisi bar spýtnıktik baılanys jáne búkil el aýmaǵyn qamtıtyn keń jolaqty ınternetti qosa alǵanda barlyq telekommýnıkalyq quraldarmen jabdyqtalǵan.
2012 jyldyń 5 aıy ishinde «Densaýlyq», «Járdem» jáne «Salamatty Qazaqstan» emdeý-dıagnostıkalyq poıyzdary arqyly 38 myń qazaqstandyqqa, onyń ishinde 12,5 myń balaǵa dárigerlik kómek kórsetildi.
Sonymen qatar, 50 jyljymaly medıtsınalyq mobıldik keshender satyp alynyp, óńirlerge jetkizildi. Jalpy alǵanda jyljymaly medıtsınalyq keshenderdiń mamandary 150 myńnan astam adamdy tekserip, 170 myńdaı zerthanalyq-dıagnostıkalyq zertteýler jasady.
Otyrysta nátıjege baǵyttalǵan, birlese atqarylǵan jumystar arqyly ǵana alǵa qoıylǵan maqsatqa jetýge bolatyny atap kórsetildi. Basty maqsat - qazaqstandyqtardyń densaýlyǵyn saqtap, ómirlerin qorǵaý.
