Eldegi qazirgi naqty dinı ahýaldy eskere otyryp, din salasyn retteıtin zańnamany keshendi túrde jetildirý qajet - Din isteri jónindegi agenttik tóraǵasy
TANA. 14 qyrkúıek. QazAqparat /Aıdar Ospanalıev/ - «Eldegi qazirgi naqty dinı ahýaldy eskere otyryp, din salasyn retteıtin zańnamany keshendi túrde jetildirý qajet»,-dedi búgin Din isteri jónindegi agenttiginiń tóraǵasy Qaırat Lama Shárip. Bul týraly ol búgin L.N.Gýmılev atyndaǵy Eýrazııa Ulttyq ýnıversıtetinde ótken Parlament Májilisiniń qoǵamdyq palatasynyń otyrysynda málim etti.
Agenttik tóraǵasynyń aıtýynsha, dinı birlestikterdiń memleketten bólek ekendigi zańnamamyzda burynnan kórsetilgen. Alaıda dinı birlestikter men túrli konfessııa ókilderimen ózara baılanys tájirıbesi elimizde mıssıonerlik qyzmettiń dinı mazmundaǵy kitaptardy taratýdyń, rýhanı oqý oryndaryn lıtsenzııalaýdyń, sondaı-aq zańdy tulǵalardyń dinı qyzmetpen aınalysýynyń biregeı talaptarynyń joqtyǵy eldegi din salasyn quqyqtyq retteý sharalarynyń jetkiliksiz ekendigin kórsetip otyr.
«Memlekettiń osy jyldarda dinı qaýymdastyqpen ózara baılanysýy jáne konfessııaaralyq kelisim salasynda jınaqtaǵan tájirıbesi 1992 jylǵy zańnamaǵa ózgerister engizý qajettigin kórsetip otyr. Osyǵan oraı eldegi qazirgi naqty dinı ahýaldy eskere otyryp, zańnamany keshendi túrde jetildirý qajet»,-dedi Q.L.Shárip.
