Eldegi qazaqtardyń sany 11 mıllıonnan asty - QR Statıstıka agenttigi
ASTANA. 15 mamyr. QazAqparat - QR Statıstıka agenttigi 2013 jyldyń 1 qańtaryndaǵy jaǵdaı boıynsha qazaqtardyń sany 11 001 739 adamǵa jetkenin habarlady.
Agenttik statıstıkalyq ádistemege sáıkes 11 mıllıonynshy qazaqty anyqtaý úshin «Halyqtyń tabıǵı qozǵalysy» málimetter bazasynda izdeý júrgizdi.
2012 jyldyń 28 jeltoqsanynda dúnıege kelgenderdiń jalpy sany ishinde eki sábı dál týǵan kúnderinde Azamattyq hal aktilerin tirkeý (AHAT) organdarynda tirkelgen. Olardyń arasynan 11 mıllıonynshy qazaq - ul bala anyqtaldy. Ol anasynyń 4-shi sábıi jáne dál týǵan kúninde AHAT organdarynda tirkelgen. Jańa týǵan náresteniń aty-jóni Muhtar Ábdiraıym. Shaqalaq 2012 jyldyń 28 jeltoqsanynda týyp, OQO Qazyǵurt aýdandyq AHAT organdarynda tirkelgen.
2013 jyldyń 1 sáýirindegi málimetke súıensek, elimiz halqynyń naqtylanǵan sany 16 967 myń adamdy quraıdy. Olardyń ishinde qazaqtar 11 058 adamdy nemese 65,2 paıyzdy, orystar 3 698 myń adamdy (21,8%), ózbekter 511 myń adamdy (3%), ýkraındar 306 myń adamdy (1,8%), uıǵyrlar 243 myń adamdy (1,4%), tatarlar 203 myń adamdy (1,2%), nemister 182 myń adamdy (1,1%) jáne basqa ult ókilderi 766 myń adamdy (4,5%) qurap otyr.
