Eldegi kásiporyndar jarty jylda jarty trıllıon teńgeniń kóligin shyǵardy
NUR-SULTAN. QazAqparat – Eldegi mashına jasaý kásiporyndary jarty jylda 553 mlrd teńgeniń ónimin shyǵarǵan. Bul týraly QazAqparat Qazaqstannyń mashına jasaýshylar odaǵyna silteme jasap habarlaıdy.
Odaq ókilderi BAQ-taǵy otandyq mashına jasaý salasyn synǵa alǵan materıaldarǵa osy tsıfrdy qarsy dálel etip kórsetken.
«Bul aqparat shyndyqqa saı emes. Ol otandyq óndirýshilerdiń, memlekettik ındýstrııalandyrý saıasatyn joqqa shyǵarady. Ótken jyly «AgromashHoldıng» AQ zaýytyna QR Aýyl sharýashylyǵy mınıstrliginiń basshylyǵy baryp, salanyń jumysyna oǵ baǵasyn bergen bolatyn», - delingen málimette.
Qazaqstanda aýyl sharýashylyǵy tehnıkasynyń tutas spektri óndiriledi.
«Jitiqaradaǵy «Don Mar» kásiporny 100 paıyz otandyq qurammen dándi daqyl destelegish shyǵarsa, «Qostanaı AgromashHoldıng» kásipornyndaǵy tuqym sepkishter óndirisiniń 90 paıyzy qazaqstandyq quram. 40 paıyz otandyq qurammen kombaın da qurastyrylady», - delingen málimette.
Odaq usynǵan aqparatqa súıensek, «SemAZ» JShS MTZ traktoryn shyǵarsa, Kókshetaýdaǵy «KAIK» kásiporny egis keshenderin, tirkemeler, press-iriktegishter, aspaly jabdyqtar men basqa da quraldar shyǵarady, AVAGRO kompanııasy búrikkishter óndirisin jolǵa qoıdy.
«Qazaqstannyń mashına jasaýshylary básekege qabilettilikti arttyrý jáne óz óndiristerinde qosymsha jumys oryndaryn qurý maqsatynda qosalqy bólshekterdiń bárin ózimizde óndirýge kúsh salyp keledi. Otandyq tehnıka satyp alatyn sharýalarǵa sýbsıdııa qarastyrylǵan. Olardyń baǵasy sheteldik balamalarynan 2-3,5 ese arzan», - delingen resmı aqparatta.
