Eldegi emhanalarda turmystyq zorlyq-zombylyqtan zardap shekkenderge kómek kórsetetin jańa shtattar ashyldy - vıtse-mınıstr
ASTANA. 25 qańtar. QazAqparat /Gúlmıra Álıakparova/ - «Salamatty Qazaqstan» baǵdarlamasyna sáıkes barlyq medıtsınalyq mekemede turmystyq zorlyq-zombylyqtan zardap shekkenderge kómek kórsetetin jańa shtattar ashyldy.
Bul týraly búgin Astanada genderlik zorlyq-zombylyqqa qarsy is-qımyl máselelerine arnalǵan respýblıkalyq keńeste QR Densaýlyq saqtaý vıtse-mınıstri Erik Baıjúnisov málim etti.
E.Baıjúnisov atap kórsetkendeı, 2009 jyly Qazaqstanda áıelderge qatysty jábir kórsetýdiń 34,5 myń faktisi tirkelgen. 2008 jyly ol - 35 myń boldy. «Tómendeý úderisi baıqalǵanymen, elde turmystyq zorlyq-zombylyqtyń deńgeıi joǵary kúıinde qalyp otyr», - deıdi ol.
Áıelderge kúsh kórsetý qylmystarynyń jalpy sanynyń 39 paıyzy - tonaý, 6 paıyzy - qaraqshylyq, 14,5 - zorlyq-zombylyq, 5,4 - denege ortasha deńgeıde zaqym keltirý jáne 4,2 paıyzy - óltirý faktileri boldy.
«Densaýlyq saqtaý mınıstrliginiń statıstıkasyna sáıkes, eger 2010 jyly emdeý mekemelerine ártúrli dene jaraqattarymen 27 myń adam qabyldanǵan bolsa, sonyń 35 paıyzy - áıelder. Onyń 4 paıyzynda zaqymdar krımınaldyq sıpatta, 2 paıyzynda jaraqattardy jaqyn týystary jasaǵan. Bul tek resmı túrde tirkelgenderdiń statıstıkasy», - dedi vıtse-mınıstr.
E.Baıjúnisovtyń aıtýynsha, densaýlyq saqtaý uıymdary - áıelder kómekke júginetin birinshi mekeme. Sondyqtan 2011-2015 jyldarǵa arnalǵan «Salamatty Qazaqstan» memlekettik baǵdarlamasy aıasynda árbir emhanada psıhologtar men áleýmettik qyzmetkerlerdiń shtattary ashyldy.
«Qazirgi ýaqytta qyzmetkerlerdi jumysqa qabyldaý júrip jatyr. Bir jyl boıy olardy oqytyp, biliktiligin arttyramyz», - dedi ol.
