Eldegi din salasy qyzmetkerleri zııatkerlik qabiletterin kórsetý úshin saıysqa túspek
ASTANA. 2 jeltoqsan. QazAqparat /Gúlmıra Alıakparova/ - Qazaqstan Musylmandarynyń dinı basqarmasy din salasy qyzmetkerleriniń arasynda «HHІ ǵasyr ımamy» zııatkerlik saıysyn ótkizedi. Bul týraly QMDB-nyń resmı saıtynda habarlandy.
«Búgingi ǵalamdy jaılaǵan jahandaný dáýirinde asyl dinimizdi jalpy halyqqa nasıhattaý isimen aınalysatyn ımam-moldalar men din qyzmetkerlerine qoıylar talap óte úlken. Imam-moldalar tek jalań dinı bilimmen shektelmeı, búgingi zamannyń jańa tehnologııalaryn, álemdik tehnıka men ındýstrııa jetistikterin de tereń meńgergen, jan-jaqty bilimmen qarýlanǵan besaspap din mamandary bolýǵa tıis», - deıdi QMDB-nyń apparat jetekshisi Balǵabek Myrzaev.
«HHІ ǵasyr ımamy» zııatkerlik saıysyn ótkizý ıdeıasy QMDB tóraǵasy, Bas múftı Ábsattar qajy Derbisáli hazretke tıesili.
Saıys aldaǵy taıaý ýaqytta aldymen, Almaty qalasynda qyzmet etip júrgen ımamdardyń arasynda, odan keıin el óńirlerinde ótkiziledi dep kútilýde. QMDB «Nur-Múbarak» ýnıversıtetiniń stýdentteri men oblystardaǵy dinı medreseler shákirtteriniń de zııatkerlik deńgeılerin baıqap kórmek.
Saıys ımamdardyń ıntelektýaldyq deńgeıin, dinı bilimin kóterýge, sheshendik qabiletin arttyrýǵa, ıslam dinin nasıhattaýdyń jańa ádis-tásilderin úıretýge baǵyttalmaq.
Saıysqa túsetin ımamdar fıqh, aqıda, tarıh salalary boıynsha arnaıy daıyndalǵan test suraqtaryna jaýap beredi, sol jerde tańdalǵan taqyryp boıynsha 4-5 mınýttyq ýaǵyz aıtady, berilgen aıat-hadıstermen mazmundas qazaq maqal-mátelderi men aqyn-jyraýlardyń óleń shýmaqtaryn jatqa aıtady. Sondaı-aq arnaıy mamandar qoıatyn vıdeo suraqqa jaýap beredi. Imamdardyń emtıhan tapsyrý sátterin qazaqstandyqtar aldaǵy ýaqytta telearnalardan kóre alady.
