Eldegi densaýlyq saqtaý salasyna eńbegi sińgen qaıratkerlerge qurmet kórsetildi
ASTANA. 14 maýsym. QazAqparat - Medıtsına qyzmetkerleriniń kásibı merekesi qarsańynda Ana men bala ulttyq ǵylymı ortalyǵynyń ujymy Qazaqstannyń densaýlyq saqtaý salasyna eńbegi sińgen qaıratkerlerdi quttyqtap, qurmet kórsetti.
Ulttyq ǵylymı ortalyqta bastalǵan ǵylymı májilis aıasynda densaýlyq saqtaý isin damytýǵa qosqan erekshe úlesi úshin QR Taǵamtaný akademııasynyń prezıdenti, Leon Bernard atyndaǵy Dúnıejúzi densaýlyq saqtaý uıymy syılyǵynyń laýreaty, professor Tóregeldi Sharmanov, Qazaqstandaǵy balalar hırýrgııasynyń negizin salýshy, akademık Qamal Ormantaev, QR «Parasat» ordeniniń ıegeri, professor Tamara Chývakova jáne ǵalym Nına Kaıýpova arnaıy dıplomdarmen marapattaldy.
«Negizi, Qazaqstannyń búgingi medıtsına salasyndaǵy jetistikteri az emes. Alaıda men bir-aq máseleni erekshe atap óter edim. Astanadaǵy Ana men bala ulttyq ǵylymı ortalyǵy búginde Ortalyq Azııada ǵana emes, Shyǵys Eýropada da keńinen tanylyp úlgerdi. Bul ortalyqty shet eldede jaqsy biledi ári moıyndaıdy. Menińshe, osynyń ózi biz úshin úlken jetistik», - deıdi QR Taǵamtaný akademııasynyń prezıdenti Tóregeldi Sharmanov.
