Eldegi bıdaı baǵasyna áser etetin úsh faktor ataldy

NUR-SULTAN. QazAqparat – Qazaqstan astyq óndirýshiler odaǵy bıdaı baǵasyna áser etetin faktorlardy atap berdi, dep habarlaıdy QazAqparat tilshisi.

«Bıyl Qazaqstanda bıdaı baǵasyn belgileýge áser etetin úsh faktor bar. Bul Reseı Federatsııasyndaǵy ishki baǵa faktory. Ekinshi – rýbl, teńge baǵamy. Al úshinshi faktor Reseı Federatsııasynyń ımport kólemine baılanysty. Osy atalǵan faktorlar jalpylaı nemese jekeleı oryn alsa, onda bizdegi baǵaǵa qysym jasalady», - dedi Qazaqstan astyq óndirýshiler odaǵynyń tóraǵasy Nurlan Ospanov elordada ótken dóńgelek ústel otyrysy barysynda.

Onyń esepteýinshe, Reseı naryǵynda bıdaı baǵasy 12 myń rýbl tursa, al rýbl baǵamy, mysalǵa, 8,5 teńge bolǵanda, onda Qazaqstanda qosylǵan qun salyǵyn tóleı otyryp ákelingen bıdaıdyń tonnasy 135 myń teńgege jetedi.

Sondaı-aq odaq basshysynyń aıtýynsha, qosylǵan qun salyǵyn tólemeıtin bıdaı ımporty bar. Ondaǵy baǵa múldem basqa.

«Aldaǵy egin jınaý maýsymynda joǵaryda atalǵan úsh faktordy eskerý óte mańyzdy. Biz baqylaýdyń kerektigin únemi aıtamyz. Sebebi baǵanyń tómendeýi fermerlerimizdi qarjylyq mindetterin óteýge qabiletsiz etýi múmkin», - deıdi ol.