Eldegi balamaly qýat kózderi óndirgen energııa Qyzylorda óńirin tolyq qamtýǵa jetedi
QR Energııa mınıstrligi jańǵyrmaly energııa kózderi departamentiniń basqarma basshysy Abaı Qulanbaı OKQ-da ótken baspasóz máslıhatynda jańartylatyn energııa kózderin damytýdyń negizgi úsh sebebin atady.
«Birinshiden, Parıj kelisimi boıynsha aýaǵa taralatyn parnıkti gazdyń mólsherin tómendetý kerek. Ekinshiden, elimizdegi iri otyn-energetıkalyq resýrstardy bolashaq urpaqqa saqtap qalýdyń mańyzy zor. Úshinshiden, jańartylatyn energııa kózderiniń elimizdegi áleýeti óte joǵary. Sarapshylardyń boljamyna súıensek, jel energetıkasynyń áleýeti - jylyna 920 KVt/saǵatty quraıdy, sý energetıkasynyń áleýeti - 620 KVt/saǵat bolsa, kún energııasynyń áleýeti elimizdiń ońtústik óńirlerinde 2500-3000 KVt/saǵatty quraıdy», - deıdi basqarma basshysy.
Abaı Qulanbaıulynyń aıtýyna qaraǵanda, elimizdegi jańartylatyn energııa kózderinen óndiriletin energııanyń mólsheri sońǵy 10 jylda 8 ese ósken. 2009 jyly 140 KVt/saǵattyq 8 sý elektr stansasy bolǵan, al 2019 jyly jalpy mólsheri 680 MGVt qýaty bar iri nysandar jumys istep tur. Sońǵy 10 jylda sonymen birge sý elektr stansalarynyń áleýetin kún elektr stansalary basyp ozǵan.
«Qazirgi tańda kún, sý jáne jel energetıkasy salasyndaǵy 72 nysan jylyna 1,3 mlrd KVt/saǵattyq energııany óndirip otyr. Barlyqtaryńyzǵa túsinikti bolýy úshin aıta keteıin: 1,3 mlrd KVt/saǵat degenimiz - jalpy Qyzylorda oblysynyń bir jyl tutynatyn elektr energııasyna nemese elimizdegi eń ónerkásipti óńir Qaraǵandynyń bir aı tutynatyn energııasyna teń», - deıdi ol.
Eske sala ketsek, búgingi baspasóz máslıhatynda Qazaqstan Respýblıkasynyń Energetıka mınıstrligi osy jyly 250 MVt energııany aýktsıonǵa qoıatyny jarııalanǵan bolatyn.
