Eldegi astyqtyń - tórtten biri, altynnyń úshten biri Aqmola oblysynda óndiriledi
ASTANA. QazAqparat - Qazaqstanda jınalatyn astyqtyń - tórtten birin, qazylatyn altynnyń úshten birin Aqmola oblysy óndiredi. Bul týraly Ortalyq kommýnıkatsııalar qyzmetinde Aqmola oblysynyń áleýmettik-ekonomıkalyq damýy týrasynda baıandaǵan óńir ákimi Málik Myrzalın aıtyp berdi, dep habarlaıdy «QazAqparat» HAA tilshisi.
Oblys basshysynyń aıtýynsha, jalpy ishki ónim boıynsha óńirlik qurylymda ónerkásip sektorynyń úlesi - 25%, aýyl sharýashylyǵynyń úlesi 15% qurap otyr.
«Jalpy respýblıka boıynsha eseptegende Aqmola oblysy respýblıka kóleminde sapaly azyq-túlik astyǵynyń tórtten birin óndiredi. Bul astyqty óńirimiz eksportqa da shyǵaryp otyr. Indýstrııalandyrý baǵdarlamasynyń arqasynda oblys altyn óndirisin tórt ese ulǵaıtyp, respýblıka kólemindegi jalpy altyn óndirisiniń úlesi 34% jetti. Júk kóligi óndirisiniń jartysynan astamy (55%), kirpishtiń - 30%, unnyń 10% Aqmola óńirine tıesili. Qazaqstandaǵy ýran qorynyń shamamen 10% bizdiń aımaqta shoǵyrlanǵanyn atap ótkim keledi», - deıdi Málik Myrzalın.
TMD-da temirjol kóligi úshin moıyntirekti (mashınanyń qozǵalmaıtyn bólshegindegi biliktiń moıyny) shyǵaratyn jalǵyz kásiporyn Aqmola oblysynda ornalasqan. Málik Myrzalınniń sózine sensek, ishki suranystan bólek, óndirilgen moıyntirekterdiń 80% Reseı Federatsııasyna jetkiziledi.
