Eldegi apattyq jáne úsh aýysymdy mektep máselesi qalaı sheshiledi
NUR-SULTAN. QazAqparat - Bilim jáne ǵylym mınıstri Kúlásh Shámshıdınova elimizdegi apattyq jáne úsh aýysymdyq mektep máselesi qalaı sheshiletinin túsindirdi, dep habarlaıdy QazAqparat tilshisi.
«Búgingi tańda elimizde úsh aýysymdy jáne apattyq jaǵdaıdaǵy mektepterdiń bary belgili. Buǵan deıin habarlaǵanymyzdaı, aldaǵy 3 jylda 190 mektep salynyp, olardyń 89-y úsh aýysymdy mektep máselesin, al 13 mektep apattyq jaǵdaıdaǵy bilim nysandarynyń máselesin, al 72-i oryn jetispeýshiligi máselesin sheshetin bolady. BǴM osy jumystar boıynsha tereń taldaý jumystaryn júrgizip, aımaqtardy naqtylap otyr. Keleshekte bilim nysandary bala sanyna baılanysty salynady. Mektepterdiń qashan jáne qaıda salynatynyn jergilikti atqarýshy bılik sheshedi», - deıdi Bilim jáne ǵylym mınıstri Úkimettiń baspasóz ortalyǵynda.
Kúlásh Shámshıdınova óz sózinde memlekettik-jekemenshiktik áriptestik aıasynda da mektep jetispeýshiligi máselesi sheshilip jatqanyn atap ótti.
«Táýelsizdik alǵan jyldan beri elimizde 1672 mektep salynǵan. Taǵy da aıtarym: orta bilimniń ınfraqurylymy eń birinshi kezekte úsh aýysymdy, apattyq jáne oqýshylar orynynyń jetispeýshiligi bar mektepterdiń máselesin sheshetin bolady», - deıdi mınıstr.
Baspasóz máslıhaty barysynda mınıstr sondaı balalardyń jeke sanattaryn qoldaý sharalary qalaı iske asyrylatynyn aıtyp berdi.
«Ol maqsatta jyl saıyn bilim berý uıymyn ustap turýǵa jumsalatyn qarjy qorynyń 1 paıyzy bólinip jatyr. Bul jaǵdaıda álbette, (mekteptegi kómekpen, tegin tamaq t.s.s) tek belgili bir otbasylar sanaty qamtylady. Olardyń sanatyna AÁK alatyn otbasylardyń, AÁK almaǵanymen kúnkóris mınımýmy tómen otbasylardyń balalary, sonymen birge jetim jáne ata-ananyń qaraýynsyz qalǵan balalar, tótenshe jaǵdaıda shuǵyl kómekke muqtaj otbasylardyń balalary osy kómekpen qamtylady. Osy kómekterge ıe bolýy úshin ata-analar nemese balanyń zańdy ókilderi jazbasha túrde bilim berý uıymyna ótinish jazýy kerek», - deıdi Kúlásh Shámshıdınova.
Eske sala ketsek, búgingi Úkimet otyrysynda QR Premer-Mınıstri Asqar Mamın memlekettik-jekeshelik áriptestik (MJÁ) júıesin bilim salasynda keńinen paıdalanýdy júktegen bolatyn.
