Eldegi 65 mekteptiń ashanasy men dárethanasynda kemshilik bary habarlandy - BǴM

NUR-SULTAN. QazAqparat - «Balaǵa laıyq» mektep dárethanalary men ashanalaryn qadaǵalaý aktsııasynyń birinshi aptasynda qazaqstandyqtar 65 nysandaǵy sáıkessizdikter týraly habarlandy. Bul týraly QazAqparat QR Bilim jáne ǵylym mınıstrliginiń baspasóz qyzmetine silteme jasap habarlaıdy.

«Birinshi aptada WhatsApp jáne Telegram arnalarymyzǵa 65 nysan boıynsha 400-den astam habarlama, foto jáne beınematerıaldar kelip tústi. Ótinishterdiń basym bóligi Túrkistan, Almaty jáne Qaraǵandy oblystarynyń turǵyndarynan. Oqýshylar men ata-analar sáıkessizdikter týraly aqparatty belsendi túrde jiberip jatyr. Kolledjder men ýnıversıtetterdiń stýdentteri habarlama joldaǵan. Biz túsken ótinishtiń barlyǵyn esepke alamyz. Turǵyndar gıgıenalyq quraldardyń, jýynatyn bólmelerde qalqalardyń bolmaýy, jyly dárethanalardyń joqtyǵy, salqyn nemese dámsiz taǵamdar jáne basqalary týraly habarlap jatyr. Sonymen qatar, olar úlgili, talapqa saı keletin nysandar týraly aqparat jiberip jatqany qýantady. Aıta keteıik, aktsııa mektep ákimshiligin jazalaý maqsatynda emes, jaǵdaıdy birlesip jaqsartý maqsatynda ótkiziledi. Mektepterdi qarjylandyrý ákimdikterdiń quzyrynda bolǵandyqtan, aqparattardy solarǵa jiberemiz. Búgingi kúni barlyq eskertýdi joıý boıynsha aımaqtarmen qajetti jumystar júrgizilip jatyr», - dedi QR BǴM Balalardyń quqyqtaryn qorǵaý komıteti tóraǵasynyń orynbasary Elına Paýlı.

Eske sala keteıik, aktsııa «Mekteptiń jaqsarýyna kómektes!» uranymen ótip jatyr. Birinshi kezeń 27 sáýirde bastalǵan, 25 mamyrǵa deıin jalǵasady. Aktsııaǵa mektep oqýshylary, eriktiler, balalar ókildigi, muǵalimder, ata-analar, úkimettik emes uıymdardyń ókilderi jáne basqalar qatysa alady.