Eldegi 3679 mekteptiń dabyl qondyrǵysy polıtsııa bólimshelerine jalǵandy

NUR-SULTAN. QazAqparat – Eldegi 3679 mekteptiń dabyl qondyrǵysy polıtsııa bólimshelerine jalǵandy. Bul týraly QR Іshki ister mınıstrligi aqparattandyrý jáne baılanys departamentiniń bas mamany Ádil Sársenov vedomstvonyń onlaın brıfınginde málim etti, dep habarlaıdy QazAqparat tilshisi.

«Jalpy, balalardyń qaýipsizdigin qamtamasyz etý máselesi Memleket basshysy men QR Úkimetiniń qatań baqylaýynda. Úkimettiń birqatar otyrystarynda atalǵan problema qaraldy. Osy keńesterdiń qorytyndysy boıynsha iri qalalarda ornalasqan bilim berý uıymdarynyń beınebaqylaý júıelerin jaraqtandyrý boıynsha belsendi jumys júrip jatyr. Búgingi tańda búkil 7 370 bilim berý uıymy beınebaqylaý júıesimen jabdyqtalǵan, onyń 40 paıyzy iri qalalarda ornalasqan», - deıdi Ádil Sársenov.

Aıtýynsha, mektepterden kelip túsken beıne derekterdi jedel basqarý ortalyqtary men ishki ister organdarynyń kezekshi bólimderi únemi nazarda ustaıdy.

«Qazirgi ýaqytta barlyq bilim berý uıymdarynyń aýmaǵyndaǵy obektilerdiń syrtqy jáne ishki beınebaqylaý kameralaryn aýmaqtyq polıtsııa bólimderiniń jedel basqarý ortalyǵyna qosý boıynsha jumys jalǵasýda. Sonymen qatar, oblys ortalyqtary men iri qalalardyń mektepteri «SOS» batyrmasymen jabdyqtalǵan. Olardy mamandandyrylǵan kúzet qyzmetine jáne ishki ister organdaryna qosý boıynsha jumystar júrip jatyr. Sońǵy málimet boıynsha, mamandandyrylǵan kúzet qyzmetine mektep ǵımaratynyń 4 418 jáne polıtsııaǵa – 3 679 dabyl qondyrǵysy qosylǵan», - dedi ІІM ókili.