Eldegi 19 JEO-ny jańǵyrtýǵa 90 mlrd teńge qajet

ASTANA. QazAqparat – Elde 19 jylý-elektr ortalyǵynyń ábden tozyǵy jetken.Olardy jańǵyrtýǵa 90 mlrd teńge qajet. Memleket basshysy Qasym-Jomart Toqaev Úkimettiń keńeıtilgen otyrysynda bul jobalarǵa qajetti qarajat qaıdan alynatynyn aıtty, dep habarlaıdy QazAqparat tilshisi.

«Elektr stantsııalarynda jóndeý jumystarynyń aǵymdaǵy jospary nebári 76%, al jańa qýat kózderin iske qosý jospary 46% (956 MVt-tan 442,4 MVt) oryndalǵan. «Samuryq-Qazyna» qorynyń sol Ekibastuzdaǵy GRES-1 jáne GRES-2 sııaqty asa mańyzdy jobalardy iske asyrýynda tıisti merzimnen aıtarlyqtaı keshigý baıqalady. Bıylǵy úshinshi toqsannyń qorytyndysy boıynsha ol jobalarǵa bólingen qarajattyń ıgerilmeýi tıisinshe 40% jáne 93% boldy. Almaty qalasynyń ekologııasyn jaqsartý jobalaryn keshigip iske asyp jatyr. Jumys istep turǵan Almaty №2 JEO men №3 JEO jańǵyrtý merzimi bir jylǵa aýystyryldy», - dedi Prezıdent.

Memleket basshysy, bul másele boıynsha Prezıdent Ákimshiligi janynan qurylǵan arnaıy komıssııa keshendi sharalar ázirlegenin eske saldy.

«Baqylaý-qadaǵalaý tetigin kúsheıtip, menshik ıeleriniń jaýapkershiligin jáne jalpy salanyń tıimdiligin arttyrý qajet. Komıssııa durys jumys istemeı turǵan 19 jylý elektr ortalyǵyn anyqtady. Olardy shuǵyl jańǵyrtý qajet.

Aldyn ala esep boıynsha oǵan shamamen 90 mıllıard teńge kerek. Bul qarajat, árıne, energetıkalyq kásiporyndardyń tarıftik smetasynda eskerilgeni jón», - dedi Qasym-Jomart Toqaev.

Aıta keteıik, búgin Memleket basshysy Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr.

Jıyn barysynda elimizdiń bıylǵy áleýmettik-ekonomıkalyq damýynyń negizgi kórsetkishteri týraly esep beriledi jáne Úkimettiń 2023 jylǵa arnalǵan jumys jospary qarastyrylady dep josparlanyp otyr.