Eldegi 11 óńir tsıfrly televızııaǵa kóshti

NUR-SULTAN. QazAqparat – Elimizdiń 11 óńirinde turǵyndar tsıfrly televızııa tehnologııasyn tutynyp otyr. Bul týraly QR Aqparat jáne qoǵamdyq damý mınıstri Asqar Ýmarov aıtty, dep habarlaıdy QazAqparat tilshisi.

«2021 jyly mınıstrlik quqyǵy buzylǵan jýrnalısterdiń quqyǵyn qorǵaý reglamentin qabyldady. Qujatty qoǵam ókilderimen, buqaralyq aqparat quraldarymen jáne tıisti organdarmen birlesip muqııat talqyladyq.

Tórt myńnan astam maman salalyq jýrnalıstıka boıynsha tájirıbeden ótti. Atap aıtqanda, medıtsınalyq, ekologııalyq, dinı jáne IT salalary boıynsha tálim aldy.

Jýrnalısterdi akkredıtteýdiń jańa qaǵıdalary bekitildi. Salaýatty ómir saltyn nasıhattaıtyn áleýmettik jarnamalardy otandyq telearnalarda kórsetý qaǵıdalary naqtylandy», - dedi Asqar Ýmarov mınıstrliktiń alqa otyrysynda.

Onyń sózine qaraǵanda, saladaǵy basty máseleniń biri – otandyq buqaralyq aqparat quraldarynda memlekettik tildi qoldanylýy.

«Byltyr alǵash ret «Sóztúzer. Qate qoldanystar sózdigi» sózdigi jaryq kórdi. Bul jobanyń qazaqtildi BAQ ókilderine paıdasy kóp bolady dep oılaımyn. Tsıfrly teleradıony engizý jobasyn iske asyrý byltyr da jalǵasty. Búginde 11 óńir tsıfrly televızııaǵa tolyqtaı kóshti», - degen mınıstr el Táýelsizdiginiń 30 jyldyǵyn merekeleý aıasynda 73 medıa joba qolǵa alynǵanyn atap ótti.

«Prezıdenttiń tapsyrmasyna sáıkes, 2021 jyly otandyq teleserıaldar, derekti tarıhı fılmder óndirisin ulǵaıtýǵa den qoıdyq. Telearnalardan Ahmet Baıtursynuly, Qanysh Sátpaev sekildi ult zııalylary týraly serıaldar kórsetilip, kórermen kózaıymyna aınaldy.

«Áleýmettik mańyzy zor jobalardyń arasynda «Balapan» telearnasy janynan ashylǵan erekshe bilim berý qajettilikteri bar balalarǵa arnalǵan anımatsııa mektebiniń jumysyn aıtqym keledi. Bul jobanyń iske asyrylýy bıyl da óz jalǵasyn tabady», - dedi mınıstr.