Eldegi jylyjaılardyń 76% Túrkistan oblysynda ornalasqan
ASTANA. KAZINFORM — Eldegi jylyjaılardyń 76% Túrkistan oblysynda ornalasqan. Endi oblys ónerkásiptik jylyjaılardy damytpaq.
Oblys ákimi Nuralhan Kósherovtyń aıtýynsha, bıyl jylyjaılar kólemi 75 gektarǵa ulǵaıyp, jalpy alańy 1 715 gektarǵa jetti.
— Jylyjaılardyń birinshi aınalymynan 102 myń tonna kókónis jınaldy. Kelesi jyly kólemin qosymsha 62 gektarǵa ulǵaıtyp, úlesin 80 paıyzǵa jetkizemiz. Keles aýdanynda 500 gektarda «Ecoculture-Eurasia» iri jylyjaı kesheni salynyp jatyr. Bul jyl boıy 240 myń tonnadan astam kókónis ósirýge múmkindik beredi, — dedi N. Kósherov elordada Ortalyq kommýnıkatsııalar qyzmetinde ótken brıfıngte.
Aýyl sharýashylyǵy salasynda atqarylǵan sharalar óz jemisin kórsetip keledi. 10 aı qorytyndysy boıynsha 1 trln teńgeden astam ónim óndirilgen. Jalpy aýyl sharýashylyǵy ónimderi boıynsha Túrkistan oblysy respýblıkada alǵashqy orynda tur.
Aıta keteıik, Túrkistan oblysynda geografııalyq jáne klımattyq erekshelikterge saı úsh negizgi klaster — maqta-toqyma, júgeri, jáne et baǵyttary qarqyndy damyp keledi.
Túrkistan oblysynda beınekamera, medıtsınalyq jıhaz, turmystyq hımııalyq buıymdar shyǵarylmaq.