Qazaqstanda janarmaı baǵasyna monıtorıng kúsheıedi
ASTANA. KAZINFORM — Qazaqstanda janarmaı men avtogaz naryǵy jiti baqylaýǵa alyndy, dep habarlaıdy Básekelestikti qorǵaý jáne damytý agenttiginiń baspasóz qyzmeti.
QR Básekelestikti qorǵaý jáne damytý agenttiginiń tóraǵasy Marat Omarov janar-jaǵarmaı materıaldary naryǵyndaǵy jaǵdaı boıynsha agenttiktiń ortalyq apparaty men aýmaqtyq departamentteri ókilderiniń qatysýymen keńes ótkizdi.
Keńes barysynda agenttik tóraǵasy aýmaqtyq departamentterge munaı jetkizýshilerdiń, munaı ónimderin kóterme saýdada ótkizýshilerdiń, sondaı-aq kólik janarmaı quıý stantsııalarynyń (AJQS) jáne avtogaz quıý stantsııalarynyń (AGQS) baǵa saıasatyna monıtorıngti kúsheıtýdi tapsyrdy.
— Qazaqstan Respýblıkasynyń básekelestikti qorǵaý salasyndaǵy zańnamasyn buzý belgileri anyqtalǵan jaǵdaıda departamentterge monopolııaǵa qarsy den qoıý sharalaryn qabyldaý tapsyryldy. Sonymen qatar, agenttik básekelestikti qorǵaý salasyndaǵy zańnama talaptarynyń buzylýyna jol bermeýge baǵyttalǵan is-sharalar josparyn ázirledi. Budan bólek, óńirlik shtabtardyń qyzmeti aıasynda vedomstvoaralyq ózara is-qımyl kúsheıtiledi, — delingen habarlamada.
Osyǵan deıin Mańǵystaý oblysynda avtogazǵa suranystyń kúrt artýy men jetkizý merziminiń uzarýyna baılanysty birqatar janarmaı quıý beketinde kezek paıda bolǵanyn jazdyq.
