Eldegi jaǵdaıdy turaqsyzdandyrǵysy keletinder bar: Aıda Balaeva turǵyndarǵa eskertý jasady

ASTANA. KAZINFORM – QR Premer-mınıstriniń orynbasary – mádenıet jáne aqparat mınıstri Aıda Balaeva jańa Konstıtýtsııa jobasyn talqylaý barysynda elde qalyptasqan jaǵdaı týraly turǵyndarǵa eskertý jasady.

- Biz búginde elimizdiń aldaǵy damý baǵyty aıqyndalatyn tarıhı kezeńde ómir súrip jatyrmyz. Jańa Konstıtýtsııa jobasyn talqylaý – memleketimizdiń qoǵamdyq-saıası ómirindegi asa mańyzdy oqıǵaǵa aınaldy.

Ókinishke qaraı, keıbir áleýmetttik jeli qoldanýshylary jaǵdaıdy teris maqsatta paıdalanyp, elimizdegi qoǵamdyq-saıası ahýaldy turaqsyzdandyrýǵa baǵyttalǵan áreketterge baryp jatyr. Arandatýshylar negizsiz aqparat taratyp, jalǵan paraqshalar men akkaýnttar ashqan (mysaly, Muhtar Shahanovtyń, Shavkat Rahmonovtyń jáne ózge de tulǵalardyń atynan ashylǵan feık-akkaýnttar arqyly til, jerdi satý sekildi máseleler boıynsha arandatýshylyq aqparat pen úndeýler jarııalanýda),-dedi mınıstr óziniń Facebook paraqshasynda.

 

Sonymen qatar ol elde iri mıtıngiler men jappaı narazylyq aktsııalary ótip jatyr degen jalǵan habarlar taratylyp, Konstıtýtsııanyń jekelegen baptaryn ádeıi burmalap túsindirý faktileri de kezdesip jatqanyn atap ótti.

- Budan bólek, buqaralyq aqparat quraldary men tanymal paraqshalarǵa tehnıkalyq shabýyldar jasalyp jatqany týraly da habarlar túsip otyr. Qazirgi ýaqytta ýákiletti organ retinde biz bul jaǵdaıdy jan-jaqty zerdelep, tıisti sharalar qabyldap jatyrmyz.

Osyǵan baılanysty tek resmı aqparat kózderine ǵana senýge jáne jalǵan málimetterdi taratpaýǵa shaqyramyn. Jalǵan aqparat taratý qylmystyq jáne ákimshilik jaýapkershilikke ákep soǵady, - dedi Premer-mınıstrdiń orynbasary.

Osyǵan deıin Aıda Balaeva konstıtýtsııalyq reformalar – eldiń bolashaǵyn aıqyndaıtyn túbegeıli betburys ekenin aıtqan bolatyn.