Eldegi zaýyttar qaı kólik brendterin kóbirek shaǵyryp jatyr
ASTANA. KAZINFORM — Bıylǵy toǵyz aıda Qazaqstanda avtoónerkásip salasy 34,2 paıyzǵa ósti. Bul týraly «Qazaqstannyń Avtokólik Odaǵy» (QAO) málim etti.
Aldyn ala derekteri boıynsha 2026 jylǵy qańtar-qyrkúıekte Qazaqstanda 146 541 avtokólik tehnıkasy jasaldy. Bul byltyrǵy sáıkes kezeńdegiden (109 223) 34,2 paıyzǵa kóp. Qyrkúıekte qazaqstandyq kásiporyndar 20 215 tehnıka shyǵardy, bul kórsetkish 2025 jylǵy qyrkúıekke (13 021) qaraǵanda 55,2 paıyzǵa, al bıylǵy tamyzben (15 267) salystyrǵanda 32,4% artyq.
— Toǵyz aı qorytyndysy boıynsha Qazaqstandaǵy avtoónerkásip joǵary damý qarqynyn saqtap tur. Sala ınvestıtsııaǵa qolaıly: óndirýshiler Qazaqstandaǵy ornyn nyǵaıtyp, jańa jobalaryn júzege asyryp jatyr. Olardyń arasynda Almatyda OMODA jáne JAECOO avtokólikterin óndirý jobalary jáne Qostanaıda Li Auto avtokólikterin shyǵarýǵa daıyndyq bar. Kúzde lokalızatsııany damytý boıynsha kóptegen kelisimge qol qoıyldy. Tehnologııalyq operatsııalardy tereńdetý men el ishinde avtokomponentter óndirisin keńeıtý avtoónerkásiptiń Qazaqstan ekonomıkasyna qosatyn úlesin myǵym etedi ári arttyrady, — dep túsindirdi QAO prezıdenti Anar Maqasheva.
Qaı brendter kóp qurastyryldy?
Toǵyz aı qorytyndysy boıynsha Qostanaıdaǵy Allur («SaryarqaAvtoProm») zaýyty 56 130 tehnıka shyǵardy. Almatydaǵy Astana Motors Manufacturing Kazakhstan Changan, Chery jáne Haval brendteriniń 40 245 avtokóligin qurastyrdy. Hyundai Trans Kazakhstan kásiporny — 27 305, Kia Qazaqstan zaýyty 13 782 avtokólik shyǵardy.
Odan bólek, toǵyz aıda «SemAZ» — 2 293, QazTehna — 2 014, Hyundai Trans Auto — 998, «KAMAZ-Injınırıng» — 804, Orbis Machinery — 433, Daewoo Bus Kazakhstan — 379, « OralAgroRemMash» 158 tehnıka jasady.
Anaǵurlym kóp shyqqan brendter ondyǵyna Chevrolet (29 555 kólik), Hyundai (27 275), Kia (17 712), Changan (15 148), Chery (12 593), Haval (10 955), Jetour (6 907), JAC (4 753), Geely Galaxy (3 378) jáne MG (2 497 kólik) kirdi.
Atap aıtqanda, modelder qatarynda Chevrolet Cobalt (27 659 avtokólik), Hyundai Tucson (10 522), Kia Sportage (7 139), Hyundai Mufasa (6 743) jáne Changan CS35 Max (5 296) kósh bastady.
Bıyl 190 myń avtokólik shyǵarylady
Osy jyly Ónerkásip jáne qurylys mınıstri Ersaıyn Naǵaspaev avtokólik óndirisi salasynyń qarqyndy damyp kele jatqanyn málimdedi.
— Sońǵy 5 jylda salaǵa 457 mıllıard teńgege jýyq ınvestıtsııa tartyldy. Ótken jyly 171 myńnan astam avtokólik shyǵarylyp, óndiris kólemi 18%-ǵa artty. Bul oń dınamıka bıyl da saqtalyp otyr. Osy jyldyń 6 aıynda 94 400 kólik shyǵaryldy, bul ótken jylmen salystyrǵanda 35%-ǵa joǵary. Bıylǵy jospar — óndiris kólemin 11%-ǵa arttyryp, 190 myń kólik shyǵarý. Jalpy bıyl avtomobıl shyǵarý salasy 131,1%-ǵa ósti, — dedi Ersaıyn Naǵaspaev.
Mınıstrdiń málimdeýinshe, otandyq avtomobıl ónerkásibin odan ári damytý jáne onyń básekege qabilettiligin arttyrý maqsatynda mınıstrlik negizgi baǵyttardy aıqyndady. Olar:
— Lokalızatsııa deńgeıin odan ári arttyrý. Ol úshin negizgi basymdyq — jańa avtokomponentter óndirisin ıgerýge jáne otandyq kásiporyndardy álemniń jetekshi avtokólik kompanııalarynyń óndiris tizbekterine engizý josparlanyp otyr.
— Halyq úshin avtokóliktiń qoljetimdiligin arttyrý. Osy maqsatta avtonesıeleý men lızıng tetikterin jetildirý, onyń ishinde boryshtyq júkteme koeffıtsıentin alyp tastaý jáne jeke tulǵalarǵa arnalǵan avtolızıngti damytý kózdelgen.
— Elektr jáne gıbrıdti kólik quraldary óndirisin damytý, sondaı-aq olardy paıdalanýǵa qajetti ınfraqurylymdy qalyptastyrý. Bul zarıadtaý stantsııalar jelisin keńeıtýdi, pılotsyz kólik tehnologııalaryn qoldaný úshin qajetti jaǵdaılar jasaýdy qamtıdy.
— Menshikti zerthanalyq bazany qurý. Bul avtokólik pen avtokomponentterdiń tehnıkalyq talaptarǵa sáıkestigin el ishinde rastaýǵa, jańa ónimderdi naryqqa jedel shyǵarýǵa jáne otandyq óndiristiń damýyna yqpal etedi.
Buǵan deıin Qazaqstanda elektromobıldi satyp alý qarqyny artqanyn jazǵan edik.
