Eldegi uıaly baılanys operatorlary zańsyz oıyn bıznesindegi qarjy aǵyndaryn baqylaýǵa aldy
ASTANA. KAZINFORM – Qarjylyq monıtorıng agenttiginiń alańynda uıaly baılanys operatorlary – Tele2, Altel, Beeline, Kcell jáne Activ ókilderiniń qatysýymen jumys kezdesýi ótkizildi. Kezdesýdiń negizgi taqyryby zańsyz oıyn bıznesi arqyly ótetin qarjy aǵyndaryn toqtatý boldy.
Jumys barysynda onlaın-kazınoǵa tólem jasaý mehanızmderi kórsetildi. Ásirese, abonentterdiń uıaly baılanys balansynan qarajatty shyǵarý ádisteri talqylandy. Bul arnanyń azamattardy zańsyz oıyndarǵa tartýda keńinen qoldanylyp jatqany atap ótildi.
Anyqtalǵan derekterdi rastaý maqsatynda Agenttik tarapynan baqylaý is-sharalary júrgizildi. 2026 jyldyń 7 sáýirinde onlaın-kazıno belgileri bar 10 ınternet-resýrsta barlyq uıaly baılanys operatorynyń servısterin paıdalana otyryp baqylaý satyp alýlary jasaldy. Nátıjesinde mobıldi teńgerim arqyly tólem jasaý múmkindigi bar ekeni anyqtalyp, mundaı qarjy arnalarynyń naqty jumys istep turǵany rastaldy.
Kezdesý sońynda Agenttik baılanys operatorlaryna birneshe mindet júktedi, onyń ishinde:
– kúmándi tólemderdi anyqtaý jáne olardy buǵattaý mehanızmderin engizý;
– zańsyz oıyn qyzmeti bar ınternet-resýrstarǵa turaqty monıtorıng júrgizý;
– zańsyz oıyn platformalaryna baǵyttalǵan qarjylyq operatsııalarǵa shekteý qoıý.
Sonymen qatar kiristerdi jylystatýǵa jáne terrorızmdi qarjylandyrýǵa qarsy Qazaqstan Respýblıkasynyń zańnamasyn saqtaý máselesine erekshe kóńil bólindi.
Kezdesý nátıjesinde táýekelderdi basqarý júıelerin qaıta qaraý jáne Agenttik pen uıaly baılanys operatorlary arasynda aqparat almasýdyń biryńǵaı ádisin qalyptastyrý týraly kelisimge qol jetkizildi.
Atalǵan sharalar zańsyz oıyn bıznesiniń qarjylyq aǵyndaryn toqtatyp, azamattardy quqyqqa qaıshy áreketterden qorǵaýǵa baǵyttalǵan. Bul jumys júıeli túrde júrgizilip, Qarjylyq monıtorıng agenttiginiń baqylaýynda bolady.
Eske sala keteıik, budan buryn Qazaqstanda uıaly baılanys qyzmetiniń quny týraly jazǵan edik.
