Eldegi úsh munaı óńdeý zaýytynyń qýaty artady — Erlan Aqkenjenov
ASTANA. KAZINFORM — Jumys istep turǵan úsh munaı óńdeý zaýytyn jańǵyrtý nátıjesinde avtomobıl otynyn óndirý kólemi ulǵaıyp, onyń sapasy «K-5» standartyna deıin jaqsarady. Bul týraly QR Energetıka mınıstri Erlan Aqkenjenov Úkimette ótken baspasóz máslıhatynda málimdedi.
— Bıyl biz munaı óńdeý salasyn damytý tujyrymdamasyn ázirledik. Oǵan sáıkes, jumys istep turǵan úsh zaýyttyń jalpy qýattylyǵyn jylyna 18 mıllıon tonnadan 27,7 mıllıon tonnaǵa deıin arttyrý josparlanyp otyr, — dedi mınıstr.
Sonymen qatar mınıstr Aqtóbe oblysynda qýaty ortasha munaı óńdeý zaýytyn salý jobasy qarastyrylyp jatqanyn aıtty. Kásiporynnyń jyldyq óndiristik qýaty 2 mıllıon tonna bolady.
Erlan Aqkenjenovtiń aıtýynsha, jańa zaýyt ishki naryqty qamtamasyz etýge jáne Ortalyq Azııa elderine ónim jetkizýge baǵyttalady. Jobany júzege asyrý shamamen eki jylǵa sozylady. Bul avtomobıl otyny men basqa da munaı ónimderin óndirý kólemin arttyrýǵa múmkindik beredi.
— Qazir munaı ónimderin jetkizý kezinde qıyndyqtar týyndap otyr. Biz resýrstyq áleýeti joǵary el retinde kórshiles memleketterdi de munaı ónimderimen qamtamasyz ete alamyz. Joba eki jyldan keıin aıaqtalady. Bolashaqta bul tek avtomobıl otynynyń ǵana emes, avıatsııalyq otynnyń da qosymsha kólemin óndirýge múmkindik beredi, — dep atap ótti Energetıka mınıstrliginiń basshysy.
Budan bólek, josparlanǵan 27,7 mıllıon tonna óndiristik qýattylyqqa kirmeıtin taǵy bir munaı óńdeý zaýytyn salý múmkindigi de qarastyrylyp jatyr. Aqkenjenovtiń málimetinshe, qazirgi ýaqytta nysannyń ornalasatyn jeri tańdalyp jatyr. Joba boıynsha sheshim jaqyn arada qabyldanady.
Buǵan deıin OPEK+ elderi jeltoqsan aıynda munaı óndirisi deńgeıin ózgertpeýge kelisken edi.
