Topyraqtyń qunarlyǵy týraly málimetter biryńǵaı bazaǵa engiziledi
ASTANA. KAZINFORM — Búgin Parlament Májilisiniń jalpy otyrysynda «Topyraqty qorǵaý týraly» Zańy men ilespe qujat ekinshi oqylymda qaralyp, qabyldandy.
- Birinshiden, zań qabyldanǵannan keıin, sharýa qojalyqtary jer ýchaskeleriniń shekarasy men ólshemderin ǵana emes, sonymen qatar sapalyq derekterin de kórsete otyryp, tólqujatyn (pasport) rásimdeıtin bolady. Aldaǵy ýaqytta memleket te, sharýalardyń ózi de topyraq jaǵdaıyna júıeli túrde taldaý jasap, derekter biryńǵaı bazaǵa engiziletin bolady. Ekinshiden, qujattyń erejeleri qarashirik pen topyraq qunarlylyǵyn tolyqtyrýǵa tikeleı baılanysty ǵylymı negizdelgen ádister men utymdy tehnologııalardy mindetti túrde qoldanýdy kózdeıdi. Úshinshiden, zań jerdiń qunarly qabatyn alý jáne jyljytýǵa baılanysty normalar kúsheıtilgen, - dedi Májilis depýtaty Nurjan Áshimbetov.
Sonymen qatar ol aýyl sharýashylyǵy maqsatyndaǵy jerlerdi berý boıynsha elektrondy konkýrstar ótkizýge qatysty túzetýler engiziletinin aıtty. Bul usynystar qabyldanǵan jaǵdaıda, jer komıssııalary óz jumysyn toqtatady. Ol sheshim qabyldaý kezinde adam faktoryn boldyrmaıdy, ashyqtyqty arttyrady.
- Ekologııalyq jáne Orman kodeksterine jáne «Erekshe qorǵalatyn tabıǵı aýmaqtar týraly» Zańǵa olardyń normalaryn «Topyraqty qorǵaý týraly» negizgi Zań jobasynyń erejelerine sáıkes keltirý maqsatynda ózgerister engizildi, - dedi depýtat.
Aıta keteıik, bul qujatty Parlament Májilisi 6 mamyrda birinshi oqylymda maquldaǵan edi.
