Eldegi sýperkompıýter qaı salalardaǵy máselelerdi sheshýge yqpal etedi
ASTANA. KAZINFORM — Byltyr kúzde Qazaqstandyq Alem.Cloud álemdegi TOP-100 sýperkompıýter qataryna engeni habarlandy. Eldegi osy sýperkompıýter iske qosylǵaly qandaı nátıjelerge qol jetkizilip jatyr? Bul suraqqa Jasandy ıntellekt jáne tsıfrlyq damý mınıstrligi jaýap berdi.
- «Alem.Cloud» ulttyq sýperkompıýter klasteri Memleket basshysynyń tapsyrmasy boıynsha Jasandy ıntellekt jáne tsıfrlyq damý mınıstrligine qarasty «Ulttyq aqparattyq tehnologııalar» AQ ınfraqurylymynyń negizinde qurylǵan. Sýperkompıýter jasandy ıntellekt, joǵary ónimdi esepteýler jáne úlken derekterdi taldaý baǵyttaryndaǵy jobalardy iske asyrýǵa arnalǵan. Klasterdiń arhıtektýrasy joǵary tyǵyzdyqtaǵy biryńǵaı GPU-keshenine biriktirilgen 64 HPE Cray serveriniń bazasynda iske qosylǵan. Árbir esepteý toraby joǵary jyldamdyqty qamtamasyz etetin NVIDIA H200-ben jabdyqtalǵan. Alem.Cloud resýrstary endi zańdy tulǵalarǵa qoljetimdi. Atap aıtqanda, memlekettik organdar, ǵylymı jáne bilim berý uıymdary, startaptar, jeke kompanııalar, sondaı-aq Astana Hub rezıdentteri resýrstardy paıdalana alady. Mınıstrlik jasandy ıntellektini damytýdyń ulttyq mindetteri men jobalardyń strategııalyq mańyzyn eskere otyryp, sýperkompıýter resýrstaryn bólý erejelerin ázirledi, - delingen mınıstrliktiń Kazinform agenttigine bergen jaýabynda.
Sýperkompıýterdi paıdalanýdyń basym baǵyttaryna memlekettik basqarý, bilim berý, densaýlyq saqtaý, aýyl sharýashylyǵy men sý resýrstary, munaı-gaz salasy, taý-ken metallýrgııa kesheni, energetıka, geologııa jáne barlaý, kólik pen logıstıka, ónerkásip jáne qurylys, robototehnıka men drondar, kıberqaýipsizdik, sondaı-aq qarjylyq tehnologııalar kiredi.
- Platforma arqyly ótinim berý úshin qoldanýshy siltemege ótip, qajetti resýrstardyń kólemin (GPU), CPU, RAM, SSD tańdaıdy. Sondaı-aq jalǵa alý merzimin kórsetedi jáne jobanyń sıpattamasyn engizedi. Platformada qajetti konfıgýratsııany eseptep, qunyn shyǵaratyn arnaıy kalkýlıator qarastyrylǵan. Árbir ótinim zańdy tulǵanyń elektrondyq tsıfrlyq qoltańbasymen rastalady. Ulttyq sýperkompıýter esepteý resýrstarynyń turaqty ári úzdiksiz jumysyn qamtamasyz etedi. Qyzmetter táýlik boıy qoljetimdi, derekter rezervtik kóshirmelermen qorǵalǵan, al SLA talaptarynyń saqtalýy júıeniń qoljetimdiligi men túsinikti bolýyna kepildik beredi. Bul kompanııalar men uıymdarǵa óz jobalaryn senimdi túrde josparlap, tıimdi júzege asyrýǵa kómektesedi, - dep atalyp ótken vedomstvo aqparatynda.
Bul turǵyda jasandy ıntellekt servısterin azamattar, bıznes jáne memlekettik apparat úshin engizý jumystary jalǵasyn tabady. Atalǵan nátıjeler ulttyq úlken tildik modelder men sýperkompıýter qýattaryn paıdalaný arqyly qol jetkizildi.
Eske salsaq, byltyr shilde aıynda Memleket basshysy Qasym-Jomart Toqaev sýperkompıýterdi iske qosý rásimine qatysty.
