Eldegi sý tasqyny kólemi jaǵynan sońǵy 80 jyldaǵy eń iri tabıǵı apat – Prezıdent
ASTANA. KAZINFORM – Memleket basshysy Qasym-Jomart Toqaev elimizdiń birqatar oblysyndaǵy sý tasqyny saldarynan qalyptasqan kúrdeli jaǵdaıǵa baılanysty Qazaqstan halqyna úndeý jarııalady. Prezıdent mundaı ahýal uzaq jyldan beri bolmaǵanyn, bul kólemi jaǵynan sońǵy 80 jyldaǵy eń iri tabıǵı apat ekenin aıtty.
Memleket basshysy sý tasqynyna baılanysty elimizdiń on aımaǵynda tótenshe jaǵdaı jarııalanǵanyn aıtty. Abaı, Aqmola, Aqtóbe, Atyraý, Batys Qazaqstan, Qaraǵandy, Qostanaı, Pavlodar, Soltústik Qazaqstan jáne Ulytaý oblystary ataldy.
«Qardyń kúrt erýine baılanysty aımaqtarda sý tasqyny bolyp jatyr. Bul — tabıǵı apat. Mundaı ahýal uzaq jyldan beri bolmaǵan. Bul kólemi jaǵynan sońǵy 80 jyldan bergi eń iri tabıǵı apat deýge bolady. Jaǵdaı óte kúrdeli bolsa da, biz qıyndyqty mindetti túrde eńseremiz, barlyǵyn qalpyna keltiremiz. Eń bastysy — azamattardyń amandyǵy.» — dedi Prezıdent.
Memleket basshysy buqaralyq aqparat quraldaryn, belsendi azamattar men blogerlerdi jurtty dúrbeleńge salatyn jalǵan aqparat taratpaýǵa shaqyrdy. Qazirgi ýaqytta bılik pen qoǵamdy uıystyratyn áreketter jasaý asa mańyzdy ekenine toqtaldy.
«Azamattardy tek qana resmı aqparat kózderine súıenýge shaqyramyn» — dedi Prezıdent.
Sondaı-aq ol qutqarýshylarǵa, tártip saqshylaryna, volonterlerge jáne apatpen kúresýge atsalysyp jatqan barsha jurtqa alǵysyn aıtty.
«Osyndaı qıyn-qystaý kezde bir jaǵadan bas, bir jeńnen qol shyǵarý aıryqsha mańyzdy. Bir el, bir halyq bolyp jumylyp, bul apatty eńseremiz. Bul bizdiń qolymyzdan keledi» — dep úndeý joldady.
