Eldegi sý qoımalary men qalalardyń tsıfrlyq syńarlary jasalady
ASTANA. KAZINFORM — Qazaqstanda sý resýrstaryn basqarýdan bastap, kólik qozǵalysy men bıýdjet shyǵynyn baqylaýǵa deıingi birqatar sala tsıfrlandyrylyp jatyr. Bul týraly Premer-Mınıstrdiń orynbasary – Jasandy ıntellekt jáne tsıfrlyq damý mınıstri Jaslan Mádıev Úkimette baıandady.
Mınıstrdiń málimetinshe, Prezıdent tapsyrmasymen Sý resýrstaryn basqarýdyń ulttyq tsıfrlyq júıesi ázirlendi. Onda sý alýǵa ótinim berýden bastap, aqysyn tóleýge deıingi protsester avtomattandyrylǵan. Qazir bes sý qoımasynyń tsıfrlyq syńary jasaldy. 2027 jyldyń sońyna deıin bul júıemen barlyq sý qoımasyn qamtý josparlanyp otyr.
Keler jyly aýyl sharýashylyǵyn tsıfrlandyrýǵa da basymdyq beriledi. Atap aıtqanda, 2027 jyly Smart Data Agro jobasyn iske qosyp, Smart Farm tehnologııalaryn engizý kózdelgen.
— Kólik salasyn tsıfrlandyrýdaǵy maqsatymyz – ishki jáne halyqaralyq tasymalda qaǵaz qujattardan tolyq bas tartý. Qazir elektrondyq ruqsattar men júk qujattaryna qatysty jobalar iske asyrylyp jatyr. Birqatar elmen pılottyq jobalar qazirdiń ózinde iske asyp jatyr, — dedi J.Mádıev.
Qarjy salasynda negizgi tórt tsıfrlyq júıeni jańǵyrtý kózdelgen. Bul memlekettik qarjyny josparlaýǵa, bıýdjetti atqarýǵa, esep pen aýdıtti birtutas tsıfrlyq ekojúıege biriktirýge múmkindik beredi. Al jasandy ıntellekt bıýdjet qarajatynyń negizsiz ári tıimsiz jumsalýyna jol bermeýge kómektesedi.
— Astanada engizilgen sheshimder negizinde basqa qalalardyń da tsıfrlyq syńarlary jasalyp jatyr. Elordada joldar men ınfraqurylymnyń tsıfrlyq kartasy ázirlenip, ıntellektýaldy beınebaqylaý júıesi, kommýnaldyq jelilerdiń jaı-kúıin baqylaý, kólik aǵyndaryn basqarý jáne JI negizindegi taldaý quraldary engizilgen. Mundaı tehnologııalar apat qaýpin aldyn ala anyqtaýǵa, kólik qozǵalysyn ońtaılandyrýǵa, qaýipsizdikti kúsheıtýge jáne qalalyq qyzmetterdiń tıimdiligin arttyrýǵa múmkindik beredi, — dep atap ótti mınıstr.
Qazir bul sheshimder ózge qalalarda da qoldanysqa engizilip jatyr. Bul baǵyttaǵy jumysqa alǵashqylardyń biri bolyp Almaty qosyldy. Sonymen qatar Shymkent pen basqa da oblys ortalyqtarynda tıisti jumystar júrgizilip jatyr.
Aıta keteıik, Memleket basshysy Qasym-Jomart Toqaev bıýdjet qarajatyn josparlaý men basqarý sapasyn arttyryp, negizsiz shyǵyndardyń aldyn alý úshin JI tehnologııalaryn paıdalanýdy usyndy.
Sonymen birge, Q.Toqaev Qazaqstannyń tranzıttik áleýetin synaǵan edi.
