Eldegi sý qoımalary 100% toldy

ASTANA. KAZINFORM – Sý resýrstary jáne ırrıgatsııa mınıstrliginiń resmı ókili Móldir Ábdýálıeva eldegi sý qoımalary jaǵdaıyn baıandady.

«Aqmola oblysyndaǵy Astana jáne Sileti sý qoımalary 100% toly. Eki nysan da shtattyq kestege saı jumys istep tur. Soltústik Qazaqstan oblysyndaǵy 2 iri sý qoımasy 100%-ǵa toly, óńirde sý tasqyny jalǵasyp jatyr. Sergeev sý qoımasynda sý 316 santımetrge asty. Petropavl qalasyndaǵy Esil ózeniniń deńgeıi – 1312 sm, bir táýlikte 23 sm tómendeý baıqaldy», - dedi M.Ábdýálıeva Ortalyq kommýnıkatsııalar qyzmetinde.

Aqtóbe oblysyndaǵy eki iri sý qoımasynyń ortasha sý jınaý kórsetkishi – 97%. Eki nysan da shtattyq rejımde jumys istep tur. Shyǵys Qazaqstan oblysyndaǵy eki iri sý qoımasy boıynsha 80% sý jınaldy.

«Abaı oblysynda Shúlbi sý qoımasy 69%-ǵa toldy. Óńirde sý tasqyny jalǵasyp jatyr. Shúlbi sý qoımasyna sý jiberý jalǵasýda. Ertistegi sý qoımalary shtattyq kestege saı jumys istep tur», - dedi spıker.

Qaraǵandy oblysynda 3 iri sý qoımasy 98% toly. Jaǵdaı turaqty. Qostanaı oblysynda eki iri sý qoımasynyń ortasha sý jınaý kórsetkishi – 92%. Batys Qazaqstan oblysynda tórt iri sý qoımasy 83% sý jınady. Olardyń barlyǵy shtattyq rejımde jumys istep jatyr. Reseımen shekarada Jaıyq ózeniniń deńgeıi 884 santımetrge jetti.

«27 naýryz ben 18 sáýir kúnderi Tobyl, Esil, Jaıyq jáne Elek ózenderi basseınderiniń sý qoımalaryna 19 tekshe shaqyrym tasqyn sýy keldi. Bıyl sý jiberý kólemi 16 tekshe shaqyrym boldy. Osylaısha, qazirgi ýaqytta sý qoımalarynda 3 tekshe shaqyrym sý jınaldy. Salystyrmaly túrde bir jyl buryn 1,2 tekshe shaqyrym sý jınalǵan edi», - dedi mınıstrlik ókili.