Eldegi reformalar eleýli nátıje kórsetti — Erlan Qarın
ASTANA. KAZINFORM — QR Memlekettik keńesshisi Erlan Qarın Qytaı men Ortalyq Azııanyń «Tatý kórshilik jáne dostyq: bolashaqqa birge qadam» atty gýmanıtarlyq almasý forýmynda elimizde júzege asyrylyp jatqan reformalar men basym baǵyttar jóninde aıtyp berdi.
Memlekettik keńesshiniń aıtýynsha, Qazaqstanda qoǵamdyq ómirdiń barlyq salasyn qamtıtyn aýqymdy reformalar júrgizilip keledi.
— Sońǵy jyldary bul reformalar eleýli nátıje kórsetti. 2025 jyldyń alǵashqy 5 aıynda elimizdiń JІÓ ósimi ótken jyldyń sáıkes kezeńimen salystyrǵanda 6%-dy qurady. Negizgi kapıtalǵa ınvestıtsııalar 18%-dan astam ósti. Bul ósim — kólik, óndiristik jáne áleýmettik ınfraqurylymǵa, sondaı-aq jańa mańyzdy óndiristik nysandarǵa quıylǵan qarjynyń nátıjesi, — dedi Erlan Qarın forýmnyń ashylýynda.
Onyń aıtýynsha, joǵary ekonomıkalyq ósimmen qatar áleýmettik-gýmanıtarlyq sala da belsendi damyp keledi.
— Memleket eń aldymen jas urpaqtyń damýyna basa nazar aýdaryp otyr. Ótken jyldan bastap Prezıdent Q. Toqaevtyń bastamasymen «Ulttyq qor — balalarǵa» baǵdarlamasy júzege asa bastady, osylaısha jyl saıyn munaı tabysynyń 50%-y 18 jasqa deıingi balalarǵa aýdarylady. Bıyl «Keleshek» atty bilim kapıtalyn jınaqtaýǵa arnalǵan jańa baǵdarlama iske qosyldy. Qazirgi ýaqytta «Qazaqstan balalary» atty keshendi ulttyq baǵdarlama ázirlenip jatyr. Biz óskeleń urpaqqa quıylǵan ınvestıtsııa — el bolashaǵyna salynǵan ınvestıtsııa dep bilemiz, — dedi Erlan Qarın.
Sonymen birge, Qazaqstannyń bolashaq damý basymdyqtaryna qatysty naqty kózqarasy bar, ony bıylǵy naýryz aıynda ótken Ulttyq quryltaıda Prezıdent Q. Toqaev aıqyndap berdi. Bul bes basymdyqtyń arasynda tsıfrlandyrý men jasandy ıntellekt, energetıka, kólik jáne tranzıt, agroónerkásip kesheni men adamı kapıtal bar.
— Jalpy bizdiń elderimizdiń damý basymdyqtary týraly kózqarastarymyz úndesip jatyr. Búgingi is-shara men ekinshi sammıt Ortalyq Azııa elderi men Qytaı Halyq Respýblıkasy arasyndaǵy baılanystardyń sapaly túrde keńeıip kele jatqanyn dáleldeı túsedi. Qytaı men Ortalyq Azııa elderi basshylarynyń turaqty kezdesýleri aıasynda uıymdastyrylǵan búgingi forým — ózara senimniń berik irgetasyn qalyptastyrady. Prezıdent Q. Toqaev atap ótkendeı, Ortalyq Azııa elderiniń áleýeti men Qytaıdyń asa aýqymdy ekonomıkalyq múmkindikteriniń úılesimi kópjaqty yntymaqtastyǵymyzǵa jańa ári joǵary serpin bere alady. Osylaısha, Ortalyq Azııa men Qytaıdyń jaqyndasýy — tek qazirgi yntymaqtastyqtyń máselesi emes, bizdiń elderimizdiń bolashaǵyna salynǵan strategııalyq ınvestıtsııa. Aqparat, mádenıet jáne jańa tehnologııalar salalaryndaǵy birlesken jobalarymyz ózara tıimdi áriptestikti odan ári nyǵaıta túsetinine senimdimiz, — dedi Erlan Qarın.
Buǵan deıin Erlan Qarın Memleket basshysy Qasym-Jomart Toqaevtyń forým qatysýshylaryn quttyqtaý hatyn oqyp bergen edi.
Aıta keteıik, búgin Qazaqstanǵa Qytaı Halyq Respýblıkasynyń Tóraǵasy Sı Tszınpın keldi. Eki kúnge sozylatyn sapar barysynda elaralyq máseleler talqylanyp, memleket basshylary «Ortalyq Azııa — Qytaı» sammıtine qatyspaq.