Eldegi ózen-kólderdi qorǵaýǵa arnalǵan segiz jospar daıyndalyp jatyr
ASTANA. KAZINFORM — Sý resýrstary jáne ırrıgatsııa mınıstrliginiń Sý resýrstarynyń aqparattyq-taldaý ortalyǵy jańa Sý kodeksinde kózdelgen sý resýrstaryn qorǵaý jáne paıdalaný jónindegi segiz basseındik jospardy ázirleýdiń alǵashqy kezeńin aıaqtady.
Mınıstrliktiń baspasóz qyzmetiniń málimetinshe, alǵashqy kezeńde bastapqy derekterdi jınaý jáne taldaý boıynsha aýqymdy jumys júrgizildi. Atap aıtqanda, ózender, kólder jáne jerasty sýy týraly, klımattyq jáne gıdrologııalyq sıpattamalar, sý sharýashylyǵy ınfraqurylymy, aýyl sharýashylyǵy, ónerkásip, energetıka jáne kommýnaldyq sektorynyń sý resýrstaryna túsiretin júktemesi, sondaı-aq óńirlerdiń áleýmettik-ekonomıkalyq damýy jónindegi málimetter jınaqtaldy.
Basseındik josparlardy ázirleýdiń kelesi kezeńderinde sý nysandarynyń jaı-kúıi baǵalanyp, negizgi máseleler aıqyndalady jáne sý resýrstaryn qorǵaý men utymdy paıdalaný boıynsha keshendi sharalar ázirlenedi.
— Basseındik josparlar — eldegi sý resýrstaryn basqarýdyń jańartylǵan júıesiniń negizi. Olar segiz sý sharýashylyǵy basseıniniń árqaısysy boıynsha jeke ázirlenedi jáne óńirlerdiń naqty erekshelikterin eskerýge múmkindik beredi. Atap aıtqanda, sý resýrstarynyń kólemi, ózender men kólderge túsetin júkteme, halyq pen ekonomıkanyń qajettilikteri, ınfraqurylymnyń jaı-kúıi jáne ekologııalyq ahýal nazarǵa alynady. Osy qujattardyń negizinde sý resýrstaryn keshendi basqarýdyń Bas jospary ázirlenedi. Bul qujattar memlekettik josparlaýdyń mańyzdy elementine aınalady, — dedi QR SRIM Sý saıasaty departamentiniń dırektory Serikjan Beketaev.
Budan buryn Armenııa Qazaqstannyń sý resýrstaryn tıimdi basqarý baǵytyndaǵy bastamalaryn qoldaıtynyn jetkizdi.
