Eldegi óńdeý ónerkásibinde qanshalyqty ósim boldy
ASTANA. KAZINFORM – Qolaıly ınvestıtsııalyq jaǵdaılar elektrotehnıkalyq mashına qurastyrýdy damytýǵa yqpal etti. Bul týraly Úkimet otyrysynda QR Ónerkásip jáne qurylys mınıstri Ersaıyn Naǵaspaev málim etti.
- Jyl saıyn óńdeý ónerkásibi joǵary ósim qarqynyn kórsetip keledi. 2024 jyldan bastap sektordyń úlesi taý-ken óndirý salasynan artyp, sektorlar arasyndaǵy teńgerim ózgerdi. Ósim metallýrgııa, mashına jasaý, hımııa ónerkásibi, qurylys materıaldaryn óndirý, rezeńke jáne plastmassa buıymdary, jeńil ónerkásip salalarynyń damýy esebinen qamtamasyz etildi, - dedi E. Naǵaspaev.
Sonymen qatar ol shıkizatty ishki naryqta óńdeý mehanızmi zań júzinde bekitilip, otandyq taýar óndirýshiler men shıkizat jetkizýshilerdiń kooperatsııasy bastaý alǵanyn eske saldy. Osyndaı koopertsııalardyń aıqyn mysaly retinde «Qaınar» akkýmýlıator zaýytyn keltirýge bolady.
- Ol qorǵasyndy «Qaztsınk» kompanııasynan jeńildikpen satyp alyp, óndirilgen akkýmýlıatorlardy ishki naryqqa da, eksportqa da shyǵaryp jatyr. Sondaı-aq elektrotehnıkalyq jabdyqtar shyǵaratyn otandyq kásiporyndar «Qazaqmys» pen «Qazaqstan elektrolız zaýyty» óndiretin metaldardy paıdalanady. «Qarmet» shyǵaratyn metalloprokat «Silk Road Electronics» kásipornyna turmystyq tehnıka óndirý úshin, sondaı-aq vagon jasaý kásiporyndaryna jetkizilip, olardy qajetti shıkizatpen qamtamasyz etedi. Odan bólek metall óńdeýshi kásiporyndar men kabel zaýyttary arasynda shıkizat jetkizý jóninde kelisimder jasaldy, - dedi mınıstr.
Onyń sózine qaraǵanda, qolaıly ınvestıtsııalyq jaǵdaılar elektrotehnıkalyq mashına qurastyrýdy damytýǵa yqpal etti. Mysaly, «Silk Road Electronics» jáne «Almaty turmystyq tehnika» zaýyttarynda óndiris kólemi ósti. Byltyr «Silk Road Electronics» zaýytynda «Samsung» tehnıkasy óndirisi iske qosyldy.
Buǵan deıin byltyr elimizde óńdeý ónerkásibidegi ósim men ınvestıtsııalyq belsendilik artqanyn jazǵan edik.