Eldegi oqytý ortalyqtaryn kim qadaǵalaıdy: Astanada 250 ata-ana san soǵyp qalǵan
ASTANA. KAZINFORM — Elordalyq ata-analar Gasyr Foundation bilim berý ortalyǵyna jappaı shaǵymdandy. Olardyń aıtýynsha, Astananyń ózinde 250-den astam ata-ana alaıaqtyq qurbany bolyp otyr. Ortalyqtyń keńsesi jabyq, sabaqtar toqtatylǵan, basshylyqpen baılanys úzilgen. Kazinform agenttiginiń tilshisi ahýaldyń mán-jaıyna úńilip kórdi.
Gasyr Foundation joǵary synyp oqýshylaryn sheteldik oqý oryndaryna daıyndaıtyn bilim berý ortalyǵy retinde jumys istegen. Aǵylshyn, túrik, ıtalıan tilderiniń jáne matematıka kýrsyn usynyp, Garvard sekildi bedeldi ýnıversıtetterge deıin túsýge qoldaý kórsetýge ýáde bergen.
Alaıda mamyr aıynda sabaqtar ýaqytyly ótpeı, oqytýshylar jalaqy almaǵanyn aıta bastaǵan. Al ótken aptada basshylyqpen baılanys úzilip, ortalyqtyń Astanadaǵy keńsesi jabylǵan.
− Biz qarasha aıynyń sońynda úlken uldyń bir jyl sabaǵy úshin 1 mln 800 myń teńge tóledik. Munyń ózi jeńildik jasalǵan baǵa, eger qazir tólemeseńizder, baǵa qymbattap ketedi dedi. Sheteldik JOO-ǵa túskenshe ózimiz kómektesemiz dep ýáde berdi. Al ekinshi ulym basqa qalada oqıdy. Oǵan naýryz aıynda onlaın sabaqtardy jeńildikpen 1 mln 600 teńgege nesıege aldyq. Kúıeýim qarapaıym jumysshy, ózim áleýmettik qyzmetkermin, jalaqym 120 myń teńge. Endi nesıeni qalaı tóleýdi bilmeımiz, sabaqtar da toqtatyldy, − deıdi Aınagúl Nurmaǵambetova.
Muǵaıdar Ahmetqalıev te qańtar aıynda qyzynyń bilimi úshin ortalyqqa 2 mıllıon teńge tólegen.
— Meniń qyzym 9-synypta oqıdy. Qańtar aıynda Gasyr ortalyǵyna sheteldik JOO-ǵa túsýge daıyndalý úshin bardyq. Qyzymnyń bir qurbysy osy ortalyqta oqyp júrdi ári áleýmettik jelide jaqsy pikirler bolǵan soń senim arttyq. Biz 2 mıllıon teńge tóledik, bar bolǵany 4 aı ǵana oqydy. Árıne, til deńgeıi jaqsardy. Biraq keıinnen muǵalimderdiń ortalyqtan kete bastaǵanyn estidik. Basshylyq muny keıbir muǵalimderdiń talapqa saı kelmegenimen túsindirdi. Sóıtse, olarǵa jalaqy tólenbegen eken, — dedi ol.
Ortalyqtyń Astanada ǵana emes, Almaty men Aqtaýda da fılıaldary bar. Amaly taýsylǵan almatylyq ata-analar da jan-jaqqa hat jazyp, dabyl qaqqan.
− Biz ótken jyly Almatyda fılıaly ashylǵan «Ǵasyr» bilim berý ortalyǵy tarapynan aldanǵan ata-analarmyz. Qazir ortalyq oqý protsesin toqtatyp otyr. Al biz ortalyqtyń fılıalynda ýchaskelik polıtseımen, ortalyqtyń orynbasarlarymen birge otyrmyz, ıesin shaqyrýdy talap ettik. Bul ortalyq balalarymyzdy sheteldik joǵary oqý oryndaryna túsirýge daıyndaımyz dep ýáde berip, ár oqýshydan jyldyq oqýǵa 1,5–2 mıllıon teńgeden jınap aldy. Endi biz kelisimshartty buzyp, qarajatty qaıtarýǵa tyrysyp jatyrmyz. Alaıda ortalyq ıeleri bizben kezdesýden bas tartty. Bul iste alaıaqtyq belgileri bar dep kúdiktenemiz. Óte qomaqty soma jymqyrylýy múmkin. Sizderden qandaı da bir qoldaý kórsetýlerińizdi suraımyz, — dep jazdy almatylyq Dıana Bazarova jýrnalıst Vadım Boreıkonyń Telegram-arnasyna.
Ortalyqtyń kýratory óz esimin jarııalamaýdy ótindi jáne ózin de bul ortalyqtyń qurbany ekenin, aılar boıy jalaqysyn almaı júrgenin aıtty. Al basshylyǵymen baılanys úzilgen.
Bul ortalyqtyń resmı Instagram paraqshasy 1 maýsymnan bastap jumys onlaın formatta jalǵasatynyn jarııalady.
— Qurmetti ata-analar men oqýshylar! GASYR School sabaqtarynyń 2025 jylǵy 1 maýsymnan bastap, qaıta júrgiziletinin qýana habarlaımyz. Barlyq sabaq onlaın formatta ótedi. Ár oqýshy boıynsha úılestirý kezek tártibimen júrgiziledi. Sabyr men senimderińiz úshin alǵysymyzdy bildiremiz. Biz sizderdiń shetelge oqýǵa túsý maqsattaryńyzǵa birge qadam basamyz. Qurmetpen, GASYR School komandasy, − dep jazylǵan málimdemede.
Kazinform redaktsııasy Oqý-aǵartý mınıstrligine, Ádilet mınıstrligine jáne Astana qalasy ákimdigine saýal joldady. Alaıda eshbir mekeme ortalyqtyń qyzmetin kim qadaǵalaıtynyn jáne onyń qalaı tirkelgenin túsindirip bere almady. Eldegi bilim berý ortalyqtary memlekettik organdardyń baqylaýynan tys qalyp otyr.
Sonymen birge, agenttik Іshki ister mınıstrligine de resmı saýal joldady.
Buǵan deıin Almaty oblysynda bilim bóliminiń basshysy men 7 býhgalter sottalǵany habarlanǵan edi.