Eldegi medıtsınalyq týrızm jyl saıyn 300 mln dollar kiris ákelýi múmkin
ASTANA. KAZINFORM — Medıtsınalyq qyzmetterdiń eksportyn Kazakh Tourism kompanııasy arqyly ilgeriletý kerek. Bul týraly Quryltaıdyń jalpy otyrysynda depýtat Nurgúl Taý málim etti.
— Elimiz úshin strategııalyq mańyzy artyp kele jatqan basym baǵyttardyń biri — medıtsınalyq týrızm. 2025 jyldyń qorytyndysy boıynsha Qazaqstannyń medıtsınalyq uıymdary shamamen 80 myń sheteldik patsıentti qabyldaǵan. Sarapshylar 2030 jylǵa qaraı bul kórsetkish 300 myń adamǵa deıin arttyp, el ekonomıkasyna jyl saıyn 300 mln AQSh dollaryna deıin kiris ákeletindigin aıtyp otyr. Zertteýlerge sáıkes, medıtsınalyq týrıst qarapaıym týrıstke qaraǵanda shamamen 10 ese kóp qarajat jumsaıdy. Ambýlatorııalyq emniń ortasha baǵasy — 2 myń, statsıonarlyq emniń quny 5 myń AQSh dollaryna deıin jetedi. Taǵy bir artyqshylyǵy — medıtsınalyq týrızm ózge týrıstik baǵyttar sekildi mezgil talǵamaı, jyl boıy toqtaýsyz jalǵasa beredi, — dedi Nurgúl Taý Premer-mınıstr Oljas Bektenovtiń atyna joldaǵan saýalynda.
Osy oraıda ol medıtsınalyq týrızmniń paıdasyn tek klınıkanyń tabysymen ólsheýge bolmaıtynyn aıtty. Onyń artynda qonaqúı, kólik, qoǵamdyq tamaqtaný, týroperatorlar, aýdarma jáne basqa da qyzmet kórsetý salalary tur.
Onyń sózine qaraǵanda, osy máselelerdi júıeli sheshý maqsatynda Respublica partııasynyń fraktsııasy Densaýlyq saqtaý mınıstrligin, Parlamentarızm ınstıtýtyn jáne sarapshylar qaýymyn tarta otyryp, bir jarym jyl boıy jumys júrgizdi. Nátıjesinde, «Medıtsınalyq týrızm týraly» zań jobasy Úkimet qorytyndysyna joldandy.
— Osyǵan baılanysty kelesi suraqtardy qarastyrýdy suraımyz. Birinshiden, medıtsınalyq týrızmge qatysty negizgi uǵymdardy, oǵan qatysýshylardyń mártebesi men jaýapkershiligin naqtylaý kerek. Ekinshiden, klınıka, týroperator, qonaqúı, kólik jáne ózge de qyzmetterdi baılanystyratyn biryńǵaı úılestirý tetigin qalyptastyrý mańyzdy. Úshinshiden, gospıtaldyq servısti, patsıentti súıemeldeý sapasyn arttyrý qajet. Tórtinshiden, elimizde densaýlyq saqtaý salasyndaǵy qyzmet kórsetý sapasy men patsıent qaýipsizdiginiń eń joǵarǵy deńgeıi sanalatyn halyqaralyq JCI akkredıtteýin alǵan 10 mekeme bar. Alaıda odan ótý jáne ony qaıta rastaý medıtsınalyq uıymdar úshin eleýli qarjylyq jáne uıymdastyrýshylyq shyǵyndardy talap etedi. Elimizde ǵana emes, Ortalyq Azııada kósh ilgeri turǵan osyndaı otandyq klınıkalardy qoldaý kerek. Besinshiden, Qazaqstan medıtsınasynyń halyqaralyq tanymaldylyǵyn arttyryp, medıtsınalyq qyzmetterdiń eksportyn Kazakh Tourism kompanııasyn tarta otyryp júıeli túrde ilgeriletýdi suraımyz, — dedi depýtat.
Buǵan deıin iskerlik týrızm aıasynda Qazaqstannyń qaı óńiri kósh bastap turǵanyn jazǵan edik.
