Eldegi medıtsına uıymdarynda 45 myńnan astam bos oryn bar
ASTANA. KAZINFORM – Densaýlyq saqtaý mınıstrligi medıtsınalyq uıymdarǵa RBJ 2.0 aqparattyq júıesindegi kadrlyq derekterdi ózektendirý jumystaryn bir aı ishinde aıaqtaýdy tapsyrdy.
Bul másele QR Densaýlyq saqtaý mınıstrliginde ótken salany kadrlyq qamtamasyz etý, medıtsınalyq mamandar daıarlaý jáne medıtsınalyq bilim berýdi damytý máselelerine arnalǵan jıynda qaraldy.
Densaýlyq saqtaý mınıstri Aqmaral Álnazarova ózekti ári naqty derekter medıtsınalyq kadrlarǵa degen qajettilikti obektıvti baǵalaýǵa jáne kadrlyq josparlaý tıimdiligin arttyrýǵa múmkindik beretinin atap ótti.
«RBJ 2.0 júıesindegi málimetterdi tolyq ári sapaly ózektendirý salanyń naqty kadrlyq qajettiligin anyqtaýǵa múmkindik beredi. Bul densaýlyq saqtaý uıymdaryn mamandarmen qamtamasyz etý máselesin tıimdi josparlaýǵa, óńirlerdegi tapshylyqty naqty baǵalaýǵa jáne kadr saıasatyn jetildirýge negiz bolady. Sonymen qatar jas mamandardy óńirlerge tartý jáne olardy turaqtandyrý baǵytyndaǵy jumystardy kúsheıtý qajet», – dedi mınıstr.
Vedomstvonyń málimetinshe, 2026 jylǵy 1 qańtardaǵy jaǵdaı boıynsha elimizdiń densaýlyq saqtaý júıesinde 276 myńnan astam medıtsına qyzmetkeri eńbek etedi. Onyń ishinde 86,5 myńǵa jýyq dáriger jáne 189,5 myń orta býyn medıtsına qyzmetkeri bar.
Sonymen qatar RBJ 2.0 júıesiniń derekteri boıynsha dárigerlerge qatysty 23 161 bos shtattyq birlik, al orta býyn medıtsına qyzmetkerleri boıynsha 22 649 bos shtattyq birlik tirkelgen.
Jıynda óńirlerdegi kadr tapshylyǵyn azaıtý jáne áleýmettik qoldaý sharalaryn keńeıtý máselesine de erekshe nazar aýdaryldy. Mınıstrliktiń málimetinshe, 2025 jyly áleýmettik qoldaý sharalarymen 1 760 dáriger qamtylǵan. Bul 2024 jylmen salystyrǵanda eki eseden astam joǵary kórsetkish. Onyń ishinde myńnan astam maman aýyldyq jerlerde jumys isteıdi.
Sondaı-aq bıyl óńirlik bólý komıssııalary medıtsınalyq joǵary oqý oryndarynyń 8 495 túlegin jumysqa ornalastyrý máselesin qaraıdy.
Aıta keteıik, buǵan deıin Qazaqstanda qansha psıhıatr men psıholog jumys isteıtini týraly derekti jarııalaǵanbyz.
