Eldegi mańyzdy ózgeristerdiń taǵdyryn halyqtyń ózi referendým arqyly sheshedi - depýtat

ASTANA. KAZINFORM – Senat depýtaty Amangeldi Esbaı Memleket basshysynyń Ulttyq quryltaıdyń V otyrysyndaǵy usynystaryna qatysty pikir aıtty.

Амангелді Есбай
Фото: senate.parlam.kz

- Ulttyq quryltaıdyń otyrysynda Memleket basshysy Qazaqstannyń saıası júıesin odan ári jetildirýge baǵyttalǵan birqatar strategııalyq bastama usyndy. Atap aıtqanda, Vıtse-Prezıdent laýazymyn engizý jáne Qazaqstannyń Halyq Keńesin qurý jónindegi usynystar – eldiń memlekettik basqarý júıesin ınstıtýtsıonaldyq turǵydan nyǵaıtýǵa baǵyttalǵan keshendi reformalardyń mańyzdy bóligi. Mańyzdy jaıt – bul bastamalar parlamenttik reforma jónindegi Jumys tobynyń qyzmeti barysynda qoǵamnan, sarapshylardan, zańgerlerden jáne qoǵamdyq uıymdardan kelip túsken kóptegen usynystardy taldaý nátıjesinde qalyptastyryldy. Atalǵan ózgerister joǵarydan tańylǵan sheshim emes, kerisinshe, qoǵamdyq suranys pen kásibı pikirlerge negizdelgen. Prezıdent usynǵandaı, Vıtse-prezıdent Memleket basshysynyń usynysymen jáne Parlamenttiń kelisimi arqyly taǵaıyndalady. Onyń quzyreti Prezıdent aıqyndaıtyn ókilettikter aıasynda belgilenip, halyqaralyq alańdarda el múddesin qorǵaý, Prezıdenttiń Parlamenttegi ókildigin júzege asyrý, qoǵamdyq-saıası jáne halyqaralyq uıymdarmen ózara is-qımyl jasaý sekildi mańyzdy baǵyttardy qamtıdy. Bul ınstıtýt memlekettik basqarýdaǵy ıerarhııany naqtylap, bılik júıesiniń sabaqtastyǵyn qamtamasyz etýge baǵyttalǵan, - dedi Amangeldi Esbaı.

Onyń aıtýynsha, Memleket basshysy elge qoǵamdyq kelisim men ulttyq birlikti nyǵaıtatyn, jalpyulttyq deńgeıde turaqty dıalog júrgizýge múmkindik beretin keń platforma qajet ekenin atap ótti. Bul platforma halyqtyń birligi men tutastyǵyn nyǵaıtýǵa úles qosyp otyrǵan negizgi qoǵamdyq-saıası birlestikter men qurylymdardy qamtýy tıis.

- Osyǵan baılanysty Qazaqstan halqy Assambleıasy men Ulttyq Quryltaıdyń tarıhı turǵydan mańyzdy mıssııalaryn tabysty oryndaǵany aıtyldy. Atalǵan ınstıtýttar óz kezeńinde memleket pen qoǵam arasyndaǵy baılanysty kúsheıtýge, etnosaralyq kelisimdi qamtamasyz etýge jáne eldegi turaqtylyqty saqtaýǵa aıryqsha úles qosty. Qazirgi jaǵdaıda bul mıssııalardy jańa ınstıtýtsıonaldyq formatta jalǵastyrý qajettigi týyndap otyr. Osy logıkany negizge ala otyryp, Qazaqstannyń Halyq Keńesin qurý usynyldy. Jańa organ óz qyzmetinde Assambleıa halyqtary men Ulttyq quryltaıdyń negizgi fýnktsııalaryna strategııalyq sabaqtastyqty saqtaıdy. Onyń basty baǵyty – qazaq memlekettiligin jáne Qazaqstan Respýblıkasynyń Táýelsizdigin júıeli túrde nyǵaıtý bolyp qala beredi. Qazaqstannyń Halyq Keńesi joǵary konsýltatıvtik organ mártebesine ıe bolady. Keńestiń quramy 126 adamnan qalyptasady. Onyń ishinde 42 ókil – etnomádenı birlestikterden, 42 ókil – iri qoǵamdyq birlestikterden, sondaı-aq 42 ókil máslıhattar men óńirlik qoǵamdyq keńesterden usynylady. Bul tásil Keńeste óńirlik, áleýmettik jáne etnomádenı múddelerdiń teń dárejede qamtylýyn qamtamasyz etýge baǵyttalǵan. Sonymen qatar, Halyq Keńesi zań shyǵarý bastamasy quqyǵyna ıe bolady, bul onyń memlekettik saıasatty qalyptastyrýdaǵy rólin edáýir arttyrady, - dedi depýtat.

Atalǵan konstıtýtsııalyq jańashyldyqtardyń barlyǵy aldaǵy jalpyhalyqtyq referendýmda azamattardyń qoldaýyna ıe bolǵan jaǵdaıda ǵana iske asyrylatynyn erekshe atap ótken jón.

- Bul – usynylyp otyrǵan reformalardyń legıtımdiligi men qoǵamdyq mańyzyn aıqyndaıtyn basty shart. Men bul bastamalardy qoǵamnyń naqty suranysynan týyndaǵan, jan-jaqty oılastyrylǵan ári ýaqtyly usynystar dep sanaımyn. Vıtse-prezıdent ınstıtýty memlekettik basqarýda sheshim qabyldaý tıimdiligin arttyra otyryp, bılik organdary arasyndaǵy úılestirý men jaýapkershilikti kúsheıtedi, al Halyq Keńesi bılik pen qoǵam arasyndaǵy ashyq ári turaqty dıalogtyń tıimdi alańyna aınala alady. Eń bastysy – bul ózgeristerdiń taǵdyryn halyqtyń ózi referendým arqyly sheshedi. Osyndaı tásil Qazaqstandaǵy saıası reformalardyń shynaıy demokratııalyq sıpatyn kórsetedi dep esepteımin, - dedi senator.

Budan buryn habarlanǵandaı, Prezıdent jańa Parlamentke «Quryltaı» degen ataý berýdi usyndy.

 

Сейчас читают