Eldegi lokomotıvter qanshalyqty tozǵan
ASTANA. KAZINFORM – Eldegi júk aınalymynyń 60 paıyzǵa jýyǵy temirjolǵa tıesili. Bul týraly Úkimet otyrysynda QR Kólik mınıstri Nurlan Saýranbaev málim etti.
- Sońǵy bes jylda kólik jáne qoımalaý qyzmetiniń kórsetkishteri 2 jarym esege artyp, 2025 jyldyń qorytyndysy boıynsha 12,2 trln teńgeni qurady. Bul – ınfraqurylymdy jańǵyrtý, halyqaralyq kólik dálizderin damytý, tasymal kólemin arttyrý baǵytynda atqarylǵan jumystyń nátıjesi. Qazaqstandaǵy jalpy júk aınalymynyń 57 paıyzyn temirjol kóligi quraıdy, sondaı-aq temirjol kólik salasyndaǵy jalpy qyzmettiń úshten birin qamtamasyz etedi. Temirjol kóligi eksport pen tranzıtti tıimdi júzege asyrady. Sondyqtan el ekonomıkasyndaǵy strategııalyq mańyzy zor, - dedi N. Saýranbaev.
Temirjol salasynda negizgi úsh baǵyt bar. Olar – lokomotıvter men vagondar parki, jáne magıstraldy temirjol.
- Bul elementterdi damytý úshin jumystar kezeń-kezeńimen iske asyrylyp jatyr, ıaǵnı ótkizý qabiletin kóbeıtý jáne bolashaqtaǵy suranysty qamtamasyz etýge múmkindik berý. 2014-2019 jyldary lokomotıv satyp alý kóleminiń tómen bolýyna baılanysty parktegi tapshylyq baıqaldy. Keıingi jyldary lokomotıvter parkin jańartý boıynsha aýqymdy baǵdarlama iske asyryldy. 2028 jylǵa deıin otandyq óndiristegi jańa lokomotıvterdi jetkizý jalǵasady. Qazirgi kezde lokomotıvter parki tasymaldaý qajettiligin tolyq qamtamasyz etip otyr, - dedi mınıstr.
Onyń sózine qaraǵanda, júrgizilgen jumystardyń nátıjesinde lokomotıvterdiń tozý deńgeıi 74 paıyzdan 49 paıyzǵa deıin tómendedi. Qazirgi ýaqytta lokomotıvterdi paıdalanýdyń ortasha merzimi 30 jyldan 21 jylǵa deıin qysqardy. Sonymen qatar, lokomotıvterdiń tehnıkalyq jaǵdaıy jaqsaryp, dızel shyǵyny biraz qysqardy.
- Álemdegi jetekshi óndirýshi Wabtec málimeti boıynsha QTJ-nyń lokomotıvteri 93 memlekettiń arasynda eń tıimdi dep esepteledi. Óndiristi jáne servısti lokalızatsııalaýǵa erekshe nazar aýdarylǵan. Bul jumystar otandyq óndiristi damytýǵa jáne jańa jumys oryndaryn ashýǵa oń áserin tıgizedi, - dedi vedomstvo basshysy.
Aıta keteıik, Memleket basshysy Qasym-Jomart Toqaevtyń tapsyrmasyna sáıkes «Qazaqstan temir joly» ulttyq kompanııasynyń vokzal ınfraqurylymyn jańǵyrtý baǵdarlamasy aıasynda respýblıka boıynsha 124 vokzaldy jańǵyrtý jumysy bastalǵan bolatyn.
