Eldegi lıftilerdiń 40 paıyzy jaramsyz
ASTANA. KAZINFORM — Astanada kópqabatty turǵyn úılerdiń birinde jóndeý jumystary kezinde lıft qulady. Oqıǵa saldarynan lıftige jaýapty kompanııanyń bir qyzmetkeri qaza taýyp, eki qyzmetker jaraqat aldy. Bul jaǵdaıǵa qatysty zańger Nurjigit Sultanbek Jibek Joly telearnasynyń «Búgin LIVE» baǵdarlamasynda pikir bildirdi.
Zańgerdiń aıtýynsha, atalǵan oqıǵa boıynsha jaýapkershilik birneshe tarapqa júktelýi múmkin.
— Bul jerde úsh taraptyń da jaýapkershiligi bar dep esepteımin. Birinshiden, lıftini ornatqan kompanııa, ekinshiden, oǵan qyzmet kórsetetin mekeme, úshinshiden, páter ıeleri kooperatıvi. Qazirgi tańda adam ólimine baılanysty tergeý amaldary júrgizilip jatyr. Tergeý organy Qylmystyq kodekstiń 156-baby boıynsha is qozǵady. Nátıjesinde naqty kináli tulǵalar anyqtalyp, protsessýaldyq sheshim qabyldanady, — dedi Nurjigit Sultanbek.
Onyń aıtýynsha, jaraqattyń úsh sanaty bar, jeńil, ortasha jáne aýyr. Sonymen qatar adam ólimine ákelgen jaǵdaı bólek baǵalanady. 156-bapqa sáıkes, kináli dep tanylǵandarǵa 5 jyldan 10 jylǵa deıin bas bostandyǵynan aıyrý jazasy qarastyrylǵan.
Zańger lıftini ornatqannan keıin onyń ári qaraıǵy qaýipsiz eksplýatatsııasyna qyzmet kórsetýshi kompanııa jaýapty ekenin atap ótti.
— Qyzmet kórsetýshi mekeme lıftiniń aqaýyn der kezinde anyqtap, josparly jóndeý jumystaryn turaqty túrde júrgizip otyrýy tıis. Sonymen qatar kez kelgen jumys berýshi Eńbek kodeksine sáıkes óz qyzmetkerleriniń qaýipsizdigin birinshi kezekte qamtamasyz etýge mindetti, — dedi ol.
Sondaı-aq Qazaqstanda lıft kompanııalaryn sertıfıkattaıtyn arnaıy komıtet bar ekeni, sol organ lıtsenzııa beredi jáne jyl saıyn reglamentke saı tekseris júrgiziletini atap ótildi.
— Bul jerde tekseristerdi Ónerkásip jáne qurylys mınıstrligimen qatar, jergilikti atqarýshy organdardyń turǵyn úı ınspektsııalary da júıeli túrde júrgizip otyrýy qajet, — dedi sarapshy.
Nurjigit Sultanbektiń aıtýynsha, qazirgi tańda eldegi lıftilerdiń 40 paıyzdan astamy tozyǵy jetken, olardyń paıdalaný merzimi 25-30 jylǵa deıin sozylǵan. Al memlekettik standart boıynsha lıftiniń qyzmet etý merzimi 20 jyl ǵana. Astana qalasy boıynsha 2028 jylǵa deıin eski úılerdi renovatsııalaý baǵdarlamasy qarastyrylǵan. Baǵdarlama aıasynda lıftiler men úıdiń qasbetteri jańartylady.
Eske salsaq, Astanada jóndeý kezinde lıft qulap, bir jumysshy kóz jumǵan edi.